वाढत्या कोरोनामुळे तेजस एक्सप्रेस बंद करण्याचा निर्णय

मुंबई : रेल्वे मंत्रालय आणि इंडियन रेल्वे कॅटरिंग अ‍ॅण्ड टुरिझम कॉपोर्रेशन (आयआरसीटीसी) यांच्यावतीने चालविण्यात येणारी मुंबई ते अहमदाबाद खासगी तेजस एक्सप्रेस 2 एप्रिलपासून बंद करण्याचा निर्णय घेतला आहे. मुंबईत वाढत्या कोरोनाचा रुग्णांमुळे रात्रकालीन संचारबंदी लावण्यात आली आहे. त्यामुळे पुढील आदेश मिळेपर्यंत तेजस एक्स्प्रेस बंद करण्याचा निर्णय घेतला असल्याची माहिती आयआरसीटीसीकडून देण्यात आलेली आहे. 

कोरोनाच्या पार्श्वभूवीर देशात धावणार्‍या आयआरसीटीसीच्या तिन्ही खासगी ट्रेन सुद्धा रद्द करण्यात आल्या होत्या. ज्यात मुंबई- अहमदाबाद तेजस एक्स्प्रेस, दिल्ली-लखनऊ तेजस एक्स्प्रेस आणि काशी महाकाल एक्स्प्रेसचा समावेश आहे. मात्र,  अनलॉकमध्ये मुंबई ते अहमदाबाद दरम्यान धावणारी खासगी तेजस एक्सप्रेस 17 ऑक्टोबरपासून सुरू करण्यात आली होती. 

आता हेलिकॉप्टरमधून घ्या विरारच्या जीवदानी मातेचे दर्शन

मात्र यावेळी प्रवाशांचा प्रतिसाद न मिळाल्याने  पुन्हा एकदा खासगी तेजस बंद करण्यात आली होती. त्यानंतर 14 फेब्रुवारी  रोजी मुंबई-अहमदाबाद तेजस एक्स्प्रेस सुरू केली होती. मात्र, आता मुंबईत कोरोनाची दुसरी लाट आल्याने कोरोनाच्या रुग्ण संख्येत झपाट्याने वाढ होत आहे. त्यामुळे खबरदारी म्हणून मुंबईसह संपूर्ण राज्यात संचार बंदी लावण्यात आली आहे. गुजरातमध्येही कडक नियमावली आखण्यात आली आहे. त्यामुळे तेजस एक्स्प्रेसचे प्रवासी संख्या मोठ्या प्रमाणात घटली आहे. परिणामी पुन्हा एकदा मुंबई-अहमदाबाद तेजस एक्सप्रेस बंद करण्यात आल्याची माहिती आयआरसीटीद्वारे देण्यात आली आहे.