आवक वाढल्याने कोथिंबिरीचे दर कोसळले

वाशी : दरवेळी पावसाळ्यात कोथिंबिरीची टंचाई भासते, मात्र या वर्षी पावसाळी हंगामात कोथिंबिरीचे अपेक्षेपेक्षा चांगले पीक आल्याने मुंबई बाजारात सध्या कोथिंबिरीची आवक दुप्पट झाली आहे. मात्र त्या मानाने कोथिंबिरीची मागणी स्थिर असल्याने बाजारात कोथिंबिरीचे दर कोसळले आहेत. घाऊक बाजारात पाच ते सहा रुपयांना विकली जाणारी कोथिंबिरीची जुडी तीन रुपयांवर आली आहे.

मुंबई बाजारात दररोजची कोथिंबिरीची मागणी पूर्ण करण्यासाठी ३० ते ४० गाड्या कोथिंबिरीची गरज असते. दोन दिवसांपासून कोथिबिरीची आवक ६० ते ७० गाड्यावंर गेली आहे. त्यामुळे आवक दुप्पट झाली आहे आणि दर उतरले आहेत. ढीगच्या ढीग कचऱ्यात फेकून दिल्याचे दिसते.

सर्वत्र चांगले पीक

कोथिंबिरीचे पीक नाजूक पीक म्हणून ओळखले जाते. जरा जास्त पाणी लागले तर हे पीक खराब होते, कमी पाणी मिळाले तर करपून जाते. मात्र या वेळी कमी जास्त पाऊस असल्याने सर्वच ठिकाणी कोथिंबिरीचे पीक चांगले आले आहे. त्यामुळे ही आवक वाढली आहे.