लग्नाच्याच दिवशी नवविवाहित जोडप्यावर गुन्हा दाखल! जाणून घ्या कारण

मुंबई : कोरोना व्हायरसनं सर्वत्र धुमाकूळ घातला आहे. अशातच कर्जतमध्ये सोशल डिस्टन्सिंगचे तीन तेरा वाजल्याचं चित्र समोर आलं आहे. कर्जत पोलिसांनी लग्नाच्या दिवशीच एका नव-विवाहित जोडप्यावर आणि त्यांच्या आई-वडिलांविरोधात गुन्हा दाखल केला. लॉकडाऊनच्या नियमांचं उल्लंघन केल्याचा आरोप त्यांच्यावर आहे. या लग्न सोहळ्यात 150 हून अधिक नातेवाइक सहभागी झाले होते. कर्जत जिल्ह्यातील मुद्रे तहसील येथे रविवारी दुपारी ही घटना घडली.

लॉकडाऊनच्या नियमानुसार केवळ 50 लोक जमा होऊ शकतात. परंतु या सोहळ्यात 150 हून अधिक लोक उपस्थितीत होते, अशी माहिती पोलिसांनी दिली. पोलिसांना सोशल मीडियावरच्या पोस्टवरून या लग्नसोहळ्याची माहिती मिळाली.

पोलिसांच्या माहितीनुसार, नवरा-नवरी आणि त्यांच्या पालकांविरोधात कलम 188, 269 आणि 270 अन्वये गुन्हा दाखल केला आहे. पाच जणांविरोधात गुन्हा दाखल केला असून, अद्याप यात कुणालाही अटक केली नाही. तर मंगल कार्यालयाच्या मालकावरही गुन्हा दाखल केला पाहिजे, अशी मागणी तक्रारदारानं केली आहे.

मान्सूनच्या आगमनाने मुंबईकर सुखावले! शहरात जोरदार वाऱ्यासह पावसाची एन्ट्री

कर्जत तहसीलदार विक्रम देशमुख म्हणाले, मिशन बिगिन अगेनच्या सुधारित मार्गदर्शक नियमावलीनुसार महसूल विभागाच्या पूर्वपरवानगीने 50 जण लग्नाला उपस्थित राहू शकतात. या प्रकरणात, वर- वधू किंवा त्यांच्या कुटुंबीयांनी परवानगीसाठी अर्ज केला नाही. सभागृहाच्या मालकाने त्यांच्या कुटुंबियांना मान्यता मिळाली का नाही हे तपासलं आहे का? याचीही चौकशी करणार आहेत. 

वधू किंवा वर किंवा त्यांच्या कुटुंबियांनीही महसूल विभागाच्या परवानगीसाठी अर्ज केला नव्हता अशी माहितीही  कर्जतचे तहसीलदार विक्रम देशमुख यांनी दिली आहे.

मुंबईत पावसाळी आजारासाठी पालिकेकडून विशेष रुग्णालयासाठी नियोजन

कर्जत येथील सामाजिक कार्यकर्ते हृषिकेश जोशी यांनी याबाबत तक्रार दाखल केली. त्यांनी म्हटलं की, नवविवाहित दाम्पत्याला दुखावण्याचा माझा कोणताही हेतू नव्हता. मात्र कनिष्ठ बांधकाम पर्यवेक्षक म्हणून कर्जत नगरपरिषदेमध्ये काम करणारे सभागृहाचे मालक निलेश चौंडिये यांच्याकडून नियमांचं उल्लंघन करण्यात येत होतं. वैयक्तिक स्वार्थासाठी गर्दी जमवणाऱ्या मंगल कार्यालयाच्या मालकाविरोधातही पोलिसांनी गुन्हा दाखल करावा, असंही त्यांनी म्हटलं आहे.