एमबीबीएस प्रवेशातून ६५ कोटी गोळा ईडीचे आरोपपत्र; मायणीत देशमुखांसह इतरांकडून ३५० जणांची फसवणूक | Sakal
sakal

बोलून बातमी शोधा

crime update ED charge sheet 350 people cheated Mahadev Deshmukh mbbs scam mumabi

MBBS प्रवेशातून जमवली ६५ कोटींची माया; ईडीकडून आरोपपत्र!

मुंबई : मायणी (ता. खटाव) येथील वैद्यकीय महाविद्यालयाचे अध्यक्ष महादेव देशमुख यांनी इतर सहकाऱ्यांच्या मदतीने ३५० विद्यार्थ्यांची फसवणूक करत ६५.७ कोटी रुपये गोळा केले. एमबीबीएस अभ्यासक्रमाच्या प्रवेशात विद्यार्थ्यांची फसवणूक करण्यात आली. महादेव देशमुख यांच्याविरोधात दाखल केलेल्या आरोपपत्रात ईडीने हा आरोप केला आहे. वैद्यकीय महाविद्यालयातील प्रवेशासाठी विद्यार्थ्यांकडून पैसे घेत फसवणूक करण्यात आल्याचे समोर आले असल्याचे ईडीने म्हटले आहे.

श्री छत्रपती शिवाजी शिक्षण संस्थेच्या इन्स्टिट्यूट ऑफ मेडिकल सायन्स ॲण्ड रिसर्च सेंटरमध्ये एमबीबीएसच्या अभ्यासक्रमांना प्रवेश दिले जात होते. मात्र, धक्कादायक बाब म्हणजे मेडिकल कौन्सिल ऑफ इंडिया आणि महाराष्ट्र आरोग्य विज्ञान विद्यापीठाचीही परवानगी घेण्यात आली नव्हती. विद्यार्थ्यांकडून पैसे घेण्यात आले. मात्र, त्यांना प्रवेश देण्यात आले नाहीत किंवा त्यांचे पैसेही परत देण्यात आलेले नाहीत.

ईडीने दाखल केलेल्या आरोपपत्रातील माहितीनुसार दोन विद्यार्थ्यांच्या पालकांनी वैद्यकीय प्रवेशासाठी १५ ते ४५ लाख रुपये दिले होते. इतर विद्यार्थ्यांनी प्रवेशासाठी किती पैसे दिले, याची माहितीही आरोपपत्रात देण्यात आली आहे. एका महिला पालकाने २०१६ मध्ये तिच्या मुलीच्या प्रवेशासाठी ४५ लाख रुपये दिले होते, त्याची पावतीही देण्यात आली नव्हती. माझ्या मुलीला प्रवेश देण्यात आला नाही आणि पैसेदेखील परत दिले नाहीत, असा आरोप या महिलेने केला आहे. याप्रकरणी २०१९ मध्ये पुणे पोलिसांकडे तक्रार करण्याचे प्रयत्न केले होते. मात्र, त्यामध्ये यश आले नाही. मात्र, गेल्यावर्षी तक्रार नोंदवली गेल्याची माहिती संबंधित महिलेने दिली आहे.

विद्यार्थ्यांकडून रोख रकमेच्या स्वरूपात पैसे घेण्यात आले आणि ते श्री छत्रपती शिवाजी शिक्षण संस्थेच्या खात्यात रुग्णालयाची कमाई म्हणून जमा करण्यात आल्याचे ईडीने आरोपपत्रात दाखवले गेले, असे म्हटले आहे. ही रक्कम महादेव देशमुख, मोहम्मद सिद्दिकी आणि इतरांच्या खात्यात वळविण्यात आली. वैद्यकीय उपकरणे खरेदी, कंत्राटदारांच्या कामाची रक्कम देणे आणि इतर कारणे दाखवत ही रक्कम चेकद्वारे काढली गेली आणि वैयक्तिक लाभासाठी, संपत्ती खरेदीसाठी ती वापरली गेली, असा दावाही ईडीने आरोपपत्रात केला आहे.

आंगडिया व्यावसायिकाची मदत

ईडीच्या आरोपपत्रात श्री छत्रपती शिवाजी शिक्षण संस्थेसाठी हवालाच्या माध्यमातून १५ ते २० कोटी रुपयांचा मिळविल्याचे म्हटले आहे. त्यासाठी एका आंगडिया व्यावसायिकाची मदत घेण्यात आली. त्या व्यावसायिकाला त्यासाठी तीन ते चार लाख रुपये कमिशन देण्यात आले होते, अशी माहिती या आंगडिया व्यावसायिकाच्या मुलाने दिल्याचा दावा ईडीकडून करण्यात आला आहे.

Web Title: Crime Update Ed Charge Sheet 350 People Cheated Mahadev Deshmukh Mbbs Scam Mumabi

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top