Dasara Melava : शिवाजी पार्क मिळविण्यासाठी शिवसेना गट जाणार न्यायालयात

मुंबई - शिवाजी पार्क येथे दसरा मेळाव्यासाठी परवानगी न मिळाल्यास न्यायालयात जाण्याची तयारी आता शिवसेना ठाकरे गटाने केली आहे.

शिवाजी पार्क मैदानावर २४ ऑक्टोबर रोजी 'दसरा मेळावा' घेण्यासाठी परवानगी मिळविण्याकरिता मुख्यमंत्री एकनाथ शिंदे गट आणि शिवसेना उद्धव ठाकरे गटाकडून पालिकेचे जी-उत्तर विभागाच्या सहाय्यक आयुक्त यांना पत्रं देण्यात आले आहे. ठाकरे गटातर्फे तर ३ ऑक्टोबर रोजी स्मरणपत्रही दिले आहे.

मात्र अद्यापही ठाकरे गटाला पलिकेकडून होकार अथवा नकार कळविण्यात आलेले नाही. त्यामुळे आज पुन्हा एकदा शिवसेना आमदार, नेते अनिल परब यांच्या नेतृत्वाखाली शिष्टमंडळाने पुन्हा एकदा जी- उत्तर विभाग अधिकाऱ्याची भेट घेतली.

येत्या दोन दिवसात परवानगीबाबत कळविण्यात येईल, असे विभाग अधिक-यांनी शिवसेना नेते परब यांना सांगितले. त्यामुळे आता दोन दिवस पालिकेच्या उत्तराची वाट बघू त्यानंतर न्यायालयात जाण्याचा इशारा ठाकरे गटाने दिला आहे. गेल्या ३ ऑक्टोबर रोजी पालिकेला ठाकरे गटाने स्मरणपत्रही दिले होते.

१ ऑगस्ट रोजीही शिंदे गटाने अर्ज दिल्याचे पालिकेकडून सांगण्यात येते. मात्र १ ऑगस्ट रोजी अर्ज देणारे आमदार सदा सरवणकर यांचे अर्जावर फक्त नाव दाखवले जात असून इतर काहीच माहिती नाही. त्यामुळे शंका निर्माण होत असल्याचे आमदार परब यांनी सांगितले.