नवी मुंबई : स्वस्तात अमेरिकन डॉलर मिळवून देण्याचे प्रलोभन दाखवून टॅक्‍सीचालक, ओला कारचालकांकडून लाखो रुपयांची फसवणूक करणाऱ्या टोळीतील युसूफ अमिर खान (२७) या भामट्याला पकडण्यात तुर्भे एमआयडीसी पोलिसांना यश आले आहे. पोलिसांनी त्याच्या इतर साथीदारांचा शोध सुरू केला आहे. या टोळीने नवी मुंबईच्या विविध भागात अनेकांना लाखो रुपयांना गंडा घातला असण्याची शक्‍यता व्यक्त करण्यात येत आहे.
या टोळीने गत आठवड्यामध्ये ठाणे येथे राहणारा राधेश्‍याम यादव (४०) तसेच पनवेलमध्ये राहणारा चेतन गायकवाड (३६) या दोघांना कमी किमतीत अमेरिकन डॉलर देण्याचे प्रलोभन दाखविले होते. या टोळीने राधेश्‍याम याला २ लाख रुपये घेऊन महापे एमआयडीसीमध्ये, तर चेतन गायकवाड याला वाशीतील जुहूगाव येथे बोलावून दोघांकडून प्रत्येकी २-२ लाखांची रक्कम लुबाडून त्यांना नोटांच्या आकाराचे कागदी बंडल असलेली पिशवी देऊन पलायन केले होते. याप्रकरणी तुर्भे एमआयडीसी व वाशी पोलिस ठाण्यात फसवणुकीचे गुन्हे दाखल झाले. तुर्भे एमआयडीसी पोलिस ठाण्यातील सहायक पोलिस निरीक्षक नांद्रे व त्यांचे पथक या प्रकरणातील आरोपींचा शोध घेण्यासाठी तक्रारदार राध्येशाम यादव याच्यासोबत शिळरोड येथील पलावा भागात गेले होते. यावेळी या टोळीतील आरोपी युसूफ अमिर खान हा आरोपी निदर्शनास आल्यानंतर पोलिसांनी त्याला ताब्यात घेतले. पोलिसांनी त्याची अधिक चौकशी केल्यानंतर त्याने व त्याच्या साथीदारांनी राध्येशाम याच्याकडून दोन लाखांची रोख रक्कम लुबाडल्याची कबुली दिली. त्यानंतर पोलिसांनी त्याला अटक केली. पोलिस आता या गुह्यात सहभागी असलेल्या दोन महिलांसह चौघांचा शोध घेत आहेत. या गुह्यातील इतर आरोपी अटक झाल्यानंतर त्यांच्याकडून अशाच प्रकारच्या फसवणुकीचे अनेक गुन्हे उघडकीस येण्याची शक्‍यता व्यक्त करण्यात येत आहे.
अशी होते फसवणूक
या टोळीतील सर्व सदस्य हे पश्‍चिम बंगालमधील असून, ते एकाचवेळी तीन ते चार महिलांसह १२ ते १४ सदस्य मुंबईत दाखल होतात. त्यानंतर भाड्याने घर घेऊन राहतात. या टोळीतील सदस्य हे टॅक्‍सी अथवा ओला-उबेर सारख्या वाहनातून प्रवास करून त्या वाहनचालकाला त्यांच्याजवळ मोठ्या प्रमाणात अमेरिकन डॉलर असल्याचे भासवून ते कमी किमतीत देण्याचे प्रलोभन दाखवितात. तसेच त्यासाठी गिऱ्हाईक शोधण्यासाठी या वाहनचालकाला सांगतात. मात्र, वाहनचालक स्वत:च या टोळीतील सदस्यांच्या प्रलोभनाला बळी पडतात.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.