DRI ची धडक कारवाई, मुंबई विमानतळावर सापडले 7 कोटींचे कोकेन

मुंबई - अंमली पदार्थ तस्कर असल्याच्या संशयावरून महसुल गुप्तवार्ता संचलनालयाने (डीआरआय) ताब्यात घेतलेल्या ३८ वर्षीय परदेशी नागरिकाच्या पोटातून कोकेन भरलेल्या ७० कॅप्सूल बाहेर काढण्यात आल्या आहेत. या कोकेनची किंमत तब्बल सात कोटी रुपये आहे. याप्रकरणी या संबंधित आरोपीला अटक करण्यात आली असून ब्रँडन सुल्पिसिअस मिगाडे (वय ३८) असे या परदेशी नागरिकाचे नाव आहे.

मिळालेली माहिती अशी की, डीआरआयने रचलेल्या सापळ्यात एक परदेशी नागरिकाला अटक करण्यात आली आहे. त्याच्या पोटातून कोकेन भरलेल्या ७० कॅप्सूल बाहेर काढण्यात आल्या आहेत. हा आरोपी मूळचा युगांडा देशाचा नागरिक असून त्याला १३ मे रोजी मुंबईतील छत्रपती शिवाजी महाराज आंतरराष्ट्रीय विमानतळावरून ताब्यात घेण्यात आले होते. तो इथोपियावरून मुंबईत आला होता. त्याच्या पोटात कोकेन असल्याचा संशय अधिकाऱ्यांना होता. त्यामुळे त्याची वैद्यकीय चाचणी करण्यासाठी न्यायालयाकडे परवानगी मागण्यात आली होती. त्यानुसार जे.जे. रुग्णालयात त्याचा एक्सरे व सोनोग्राफी करण्यात आली. त्यावेळी त्याच्या पोटात संशयीत कॅप्सूल असल्याचे निष्पन्न झाले होते.

दरम्यान, यानंतर डॉक्टरांनी त्याच्या पोटातून या ७० कॅप्सूल बाहेर काढल्या आहेत. त्यात कोकेन असल्याचे निष्पन्न झाले. जप्त करण्यात आलेल्या कोकेनचे वजन ६९० ग्रॅम असून त्याची किंमत सुमारे सात कोटी रुपये आहे. घरची आर्थिक परिस्थिती ठीक नसल्यामुळे त्याने हे काम करण्यास होकार दिला असल्याचे त्याने पोलिसांना सांगितले आहे. याप्रकरणी त्याला सोमवारी डीआरआयने अटक केली असून त्याच्या इतर साथीदारांबाबत डीआरआय अधिक तपास करत आहे.