शाहरुखची मॅनेजर पूजा ददलानीची मुंबई पोलीस करणार चौकशी

अभिनेता शाहरुख खानची मॅनेजर पूजा ददलानीने Pooja dadlani ड्रग्ज प्रकरणात आर्यनला वाचवण्यासाठी के. पी. गोसावीला KP Gosavi ५० लाख रुपये दिल्याचा गौप्यस्फोट सॅम डिसूझाने केला होता. एका वृत्तवाहिनीवरील मुलाखतीत सॅम डिसूझाने हा दावा केला होता. याप्रकरणी आता मुंबई पोलीस शाहरुखची मॅनेजर पूजा ददलानीची चौकशी करणार आहे. मुंबई पोलिसांकडून नेमण्यात आलेल्या विशेष पथकाने पूजाला सोमवारी चौकशीसाठी बोलवण्यात आल्याची माहिती समोर येत आहे. या प्रकरणात आतापर्यंत पाच जणांचे जबाब नोंदवण्यात आले आहेत.

कॉर्डिलिया क्रूझ ड्रग्ज प्रकरणात पंच असलेल्या प्रभाकर साईलने या प्रकरणात मध्यस्थ म्हणून सॅम डिसूझाचे नाव घेतले होते. आता याच आरोपाला बळकटी देणारे काही पुरावे समोर आले आहेत. शाहरुख खानची मॅनेजर पूजा ददलानीचं लोअर परळमधलं मर्सिडीज कारचं सीसीटीव्हीही फुटेज एसआयटीच्या हाती लागलं आहे. ५० लाख रुपयांची डील याच ठिकाणी झाल्याचं बोललं जातं आहे. किरण गोसावी आणि पूजा ददलानी यांच्यामध्ये डील झाल्याचा आरोप पंच प्रभाकर साईलने केला होता.

ड्रग्ज प्रकरणात आर्यनची सुटका करण्यासाठी किरण गोसावीने पूजा ददलानीला मदत करण्याचं आश्वासन दिलं होतं. जर हे खरं असेल तर किरण गोसावीच्या विरोधात एसआयटी खंडणीचा गुन्हा नोंदवण्याची शक्यता आहे. यापूर्वी गोसावीवर दोन गुन्हे दाखल झाले आहेत. सॅम डिसूझा, पूजा ददलानी आणि गोसावी यांची लोअर परळमध्ये ३ ऑक्टोबर रोजी भेट झाली होती, असंही प्रभाकर साईलने सांगितलं होतं.