अरबी समुद्रात 3 हजार कोटींचे ड्रग्ज तटरक्षक दलाकडून जप्त

मुंबई: भारतीय तटरक्षक दलाने लक्षद्वीप मिनिकॉय बेटांजवळ मोठी कारवाई करत 300 किलो हेरॉईन जप्त केले. आंतरराष्ट्रीय बाजारात त्याची किंमत सुमारे 3 हजार कोटी रुपये आहे. काही परदेशी मच्छिमार बोटी अंमली पदार्थांची तस्करी करत असल्याची माहिती मिळाल्यावरून तटरक्षक दलाने 15 मार्चपासून अरबी समुद्रात व्यापक शोधमोहीम चालवली.

दलाच्या गस्तीनौका तसेच विमाने आणि हेलिकॉप्टर यात सहभागी झाले होते. लक्षद्वीप-मिनिकॉय बेटांजवळ 18 मार्चला दलाच्या पथकांना तीन संशयास्पद मच्छिमार बोटी दिसल्या. त्यांना अडवल्यावर दलाच्या जवानांनी त्या बोटींवर जाऊन खलाशांकडे चौकशी केली असता त्यांना समाधानकारक उत्तरे मिळाली नाहीत. सखोल चौकशी आणि तपासणी केल्यावर यातील रवीहंसी या श्रीलंकेच्या मच्छिमार बोटीत हेरॉईनचा साठा असल्याचे आढळले. त्याखेरीज खलाशांकडून 5 एके 47 रायफलीही जप्त करण्यात आल्या. या तीनही बोटींवरील 19 खलाशांना पुढील कारवाईसाठी केरळला नेण्यात आले. 

मुंबई विभागातल्या ताज्या बातम्या वाचण्यासाठी येथे क्लिक करा.

या महिन्यात तटरक्षक दलाने अशा प्रकारची दुसरी मोठी कारवाई केली आहे. यापूर्वी 5 मार्चला दलाने लक्षद्वीप बेटांजवळच श्रीलंकेच्या दुसऱ्या संशयास्पद बोटीवर छापा मारला. तटरक्षक दलाच्या जवानांना पाहताच बोटीवरीच चोरट्यांनी 200 किलो हेरॉईन आणि 60 किलो हशीश भरसमुद्रात फेकून दिल्याचे मान्य केले.  गेल्या वर्षी नोव्हेंबरमध्येही तटरक्षक दलाने अशाच मोहिमांमध्ये सुमारे एक हजार कोटी रुपये किंमतीचे 120 किलो अंमली पदार्थ जप्त केले होते. वर्षभरात दलाने आतापर्यंत सुमारे 5 हजार कोटी रुपये किंमतीचे दीड टन अंमली पदार्थ जप्त केले आहेत.

हेही वाचा- सनराईज रुग्णालयातील 'ते' दोन मृत्यू आगीमुळे नाहीतर...

---------------------------------

(संपादन- पूजा विचारे)

Indian Coast Guard seized heroin major operation Lakshadweep Minicoy Island