भरोसा कक्षात 22 पीडितांना न्याय; सहा महिन्यांत तडजोडीद्वारे वाद मिटले 

अलिबाग : ज्येष्ठ नागरिक, महिला आणि बालकांवर होणारे अत्याचार, अन्याय रोखण्यासाठी रायगड जिल्हा पोलिस दलाने "भरोसा कक्ष' तयार केले आहे. याद्वारे गेल्या सहा महिन्यांत 45 जणांनी तक्रारी केल्या होत्या. त्यापैकी सुमारे 50 टक्के म्हणजे 22 महिलांना तडजोडीद्वारे न्याय मिळाला आहे. हा कक्ष मार्चपासून सुरू झाला आहे. 

धक्कादायक : चोरीसाठी आला अन्‌ जखमी झाला
 
भरोसा कक्षात अनेक पीडित मोठ्या विश्‍वासाने धाव घेत आहेत. याद्वारे पोलिस मदत, महिला हेल्पलाईन, वैद्यकीय सेवा, विधीविषयक सेवा, मानसोपचार तज्ज्ञ, कौटुंबिक हिंसाचार कायद्यांतर्गत संरक्षण देण्याचा प्रयत्न करण्यात आला आहे. भरोसा सेलमध्ये सहाय्यक निरीक्षक दर्जाचा अधिकारी असून त्यांच्यासोबत एक उपनिरीक्षक, दोन पोलिस हवालदार आणि दोन पोलिस नाईक यांचा समावेश आहे.  

हे वाचा : डायबिटीसग्रस्तांची चिंता मिटली

रायगड जिल्ह्यासाठी अलिबाग येथे हा कक्ष असून मार्च ते सप्टेंबरदरम्यान 45 तक्रारी दाखल झाल्या. त्यात एक अर्ज ज्येष्ठ नागरिकांकडून, तर 44 अर्ज महिलांवरील अत्याचाराबाबत दाखल होत्या. त्यापैकी 22 तक्रारींचे निराकरण तडजोडीद्वारे करून त्यांना न्याय देण्याचा प्रयत्न केला. उर्वरित 22 तक्रारी प्रलंबित आहेत, तर एक तक्रार समुपदेशनानंतर संबंधितांविरोधात गुन्हा दाखल करण्यात आला असल्याची माहिती कक्षाच्या वतीने देण्यात आली. 

भरोसा कक्षाद्वारे प्रकरणे तातडीने सोडविण्याचा प्रयत्न आहे. आतापर्यंत निम्मी प्रकरणे सोडवून पीडितांना न्याय देण्यात आला आहे; तर उर्वरित प्रकरणे लवकरच सोडवली जातील. 
- संगीता बोचरे-पाटील, पोलिस उपनिरीक्षक, भरोसा कक्ष.