कल्याण-डोंबिवलीत पालिकेने हाती घेतली विशेष मोहीम, कोरोना संशयित रुग्णांना मिळणार वेळीच उपचार

कल्याण : कल्याण-डोंबिवली शहरांमधील कोव्हिड साथ आटोक्यात यावी यासाठी पालिका प्रशासन विविध संकल्पना राबवत आहे. याच अंतर्गत 'फॅमिली डॉक्टर कोव्हिड फायटर' ही एक नवीन संकल्पना पालिका प्रशासनाकडून राबवली जाणार आहे. फॅमिली डॉक्टरकडे तपासणीसाठी येणाऱ्या तापाच्या रुग्णांची या संकल्पनेअंतर्गत अँटिजेन टेस्ट केली जाणार आहे. पाच-सहा डॉक्टरांचा एक क्‍लस्टर करून नजीकच्या तपासणी केंद्रावर ही तपासणी करण्यात येईल.

 ही बातमी वाचली का? ट्रेनमधून प्रवास करण्यासाठी कसा मिळवाल 'ई-पास', वाचा बातमी...

फॅमिली डॉक्टरवर रुग्णांचा विश्वास असतो. डॉक्टर आणि रुग्णाचे एक वेगळे नाते या संकल्पनेत तयार झालेले असते. त्यामुळेच फॅमिली डॉक्टरांकडे येणाऱ्या तापाच्या रुग्णांची अशा प्रकारची तपासणी होऊन कोरोना संशयित रुग्णांना वेळीच उपचार मिळतील, तसेच त्यांचे अलगीकरण करता येईल. महापौर विनिता राणे यांच्या जुनी डोंबिवली प्रभागात या संकल्पनेचा शुभारंभ करण्यात आला. या परिसरातील फॅमिली डॉक्टरांकडे येणाऱ्या रुग्णांची शास्त्रीनगर रुग्णालयात तपासणी करण्यात आली. 

ही बातमी वाचली का? मुंबईकरांना दमदार पावसाची अजूनही प्रतिक्षाच; धरणांतील पाणीसाठ्यात पुरेशी वाढ नाहीच

यावेळी 83 तापाच्या रुग्णांची अँटिजेन टेस्ट करण्यात आली. यात 34 जणांना कोरोनाची लागण झाल्याचे निष्पन्न झाले. शहरातील नगरसेवकांच्या सहकार्याने इतर ठिकाणीही अशा प्रकारची संकल्पना राबविण्यात येईल, असे महापौर विनिता राणे यांनी सांगितले. सर्वपक्षीय नगरसेवक तसेच या दोनही शहरातील फॅमिली डॉक्टर्सनी पालिकेच्या या उपक्रमाला सहकार्य करावे, असे आवाहनही पालिका प्रशासनाने केले आहे.

(संपादन : वैभव गाटे)

In Kalyan-Dombivali a special campaign was undertaken by the municipality