राज्यात 'केरळ पॅटर्न'? राजेश टोपे यांची केरळच्या आरोग्यमंत्र्यांशी चर्चा

मुंबई :  कोरोनाचा प्रादुर्भाव रोखण्यासाठी केरळने राबवलेल्या उपक्रमांचा अभ्यास राज्य सरकार करणार आहे. त्यानंतर राज्यातदेखील "केरळ पॅटर्न' राबवण्यासाठी विचार करणार असल्याचे राज्याचे आरोग्यमंत्री राजेश टोपे यांनी सांगितले. 

ही बातमी वाचली का? जेव्हा उत्पादकच बनतात विक्रेते; व्हॉट्‌स ॲप, फेसबुकद्वारे शेतमाल घरोघरी! 

कोरोना प्रतिबंधासाठी केरळ राज्याने कशाप्रकारे उपाययोजना राबवल्या आहेत याची माहिती घेण्यासाठी राज्याचे आरोग्यमंत्री राजेश टोपे यांनी आज केरळच्या आरोग्यमंत्री के. शैलजा यांच्याशी व्हिडीओ कॉन्फरन्सिंगद्वारे चर्चा केली. केरळमधील लोकसंख्येची घनता तेथील भौगोलिक, सामाजिक रचना आणि महाराष्ट्राची रचना यात बऱ्यापैकी अंतर आहे; मात्र केरळच्या आरोग्य विभागाकडून जे काही अभिनव उपक्रम हाती घेतले, त्याचा राज्यात वापर करण्याविषयी विचारविनिमय केला जाईल असेही आरोग्यमंत्री टोपे यांनी सांगितले.

ही बातमी वाचली का? कोरोनाच्या पार्श्वभूमीवर यंदाच्या विधिमंडळ पावसाळी अधिवेशनाबाबत मोठी अपडेट

कोरोनाचा प्रादुर्भाव रोखण्यासाठी केरळने काय विशेष उपाययोजना केल्या याविषयी जाणून घ्यायला आवडेल, असे सांगत आरोग्यमंत्री टोपे यांनी चर्चेला सुरुवात केली. केरळमध्ये दिवसाला १२०० च्या आसपास चाचण्या होत असून तेथे १२ ते १३ प्रयोगशाळा असल्याचे त्यांनी सांगितले. महाराष्ट्रात कोरोनाच्या प्रतिबंधासाठी घेत असलेल्या उपाययोजनांची माहिती देताना राज्यात आतापर्यंत ६१ प्रयोगशाळांच्या माध्यमातून पावणेतीन लाख चाचण्या झाल्याचे आरोग्यमंत्री टोपे यांनी सांगितले. केरळचे विलगीकरणाचे धोरण, दर दिवसाला होणाऱ्या चाचण्या, झोपडपट्ट्यांमधील संसर्ग रोखण्यासाठी केलेल्या उपाययोजना, खासगी डॉक्‍टरांचे सहकार्य, साधनसामुग्रीचा तुटवडा, कंटेन्मेंट झोनमधील प्रतिबंध, प्लाझ्मा थेरेपीचा वापर याविषयी या वेळी चर्चा करण्यात आली. लोकसंख्या आणि तिची घनता यात दोन्ही राज्यांमध्ये कमालीची भिन्नता असल्याचे त्यांनी सांगितले. यावेळी केरळचे आरोग्य विभागाचे सचिव श्री. खोब्रागडे उपस्थित होते.

ही बातमी वाचली का? गुड न्यूज आली, कोरोना संक्रमित मातांकडून 203 बाळांना सुखरूप जन्म

नागरिकांचे समुपदेशन
केरळमधील रुग्ण संख्याही कमी असून तेथे खाटांची कमतरता नाही. मानसोपचार तज्ज्ञांचे गट करून त्यांच्यामार्फत विलगीकरण केलेल्या लोकांची तसेच आरोग्य कर्मचारी यांचे समुपदेशन केले जाते. त्याचबरोबर तेथील प्रसिद्ध अभिनेते, खेळाडू, ख्यातनाम व्यक्ती यांच्या माध्यमातून आरोग्य कर्मचाऱ्यांना प्रोत्साहन देण्याचे काम केले जाते. ज्यांना मधुमेह, रक्तदाब, हृदयविकार, मूत्रपिंडाचे विकार आहेत, अशा लोकांना (कोमॉर्बीड) घराबाहेर पडू दिले जात नाही.