Dombivli MIDC Blast: डोंबिवली हादरली! MIDC मध्ये मोठा स्फोट, तीन जणांचा होरपळून मृत्यू; ३० ते ४० जण जखमी

मुंबई- डोंबिवली एमआयडीसीमध्ये एका कंपनीत मोठा ब्लास्ट झाल्याची प्राथमिक माहिती आहे. एमआयडीसी फेज दोनमध्ये हा स्फोट झाल्याचं कळतंय. स्फोटामुळे डोंबिवलीकरांमध्ये भितीचे वातावरण आहे. आकाशामध्ये धुराचे लोट पसरले आहेत. स्फोटामुळे मोठा हादरा बसला होता. अग्निशमन दलाच्या गाड्या घटनास्थळी दाखल झाल्या आहेत.

डोंबिवलीतील एमआयडीसीत केमिकल कंपनीत झालेल्या भीषण स्फोटात दोन महिलांचा मृत्यू झाल्याची प्राथमिक माहिती आहे. अनेक जण गंभीर जखमी असल्यामुळे मृतांचा आकडा वाढण्याची भीती व्यक्त करण्यात आली आहे. या भीषण स्फोटाची भीषणता इतकी होती की आसपासच्या २- ३ किलोमीटरपर्यंत इमारतींना हादरे बसले आहेत. परिसरात धुराचे लोट पसरले असून आग विझवण्याचे शर्थीचे प्रयत्न सुरू आहेत. मात्र आगीची दाहकता प्रचंड असल्याने आसपासच्या कंपन्यांनाही धोका निर्माण झाला आहे.

तर या भीषण आगीमध्ये तीन मृतदेह पूर्णपणे जळालेल्या अवस्थेत सापडल्याची माहिती आहे.

घराच्या काचा देखील फुटल्या

अनेक नागरिक जखमी झाल्याची माहिती आहे. जखमींना एम्स रुग्णालयात हलवले जात आहे. आग विझवण्याचे प्रयत्न सुरु आहेत. आग सिलेंडरची आहे की इतर कशाची याबाबत अद्याप माहिती मिळू शकलेली नाही. पण, बॉयलर स्फोट झाल्याचा संशय व्यक्त केला जात आहे. आग इतर कंपन्यांमध्ये पसरली आहे. अद्याप जीवितहानीची माहिती नाही. पण, अनेकजण जखमी झाले आहेत. लोकांच्या घराच्या काचा फुटल्या आहेत. यामुळे २५ ते ३० नागरिक जखमी झाल्याचं कळतंय.

आग इतर कंपन्यांमध्ये पसरली

दुपारी दीडच्या सुमारास कंपनीमध्ये आग लागल्याची माहिती आहे. आग विझवण्याचे काम युद्धपातळीवर सुरु आहे. सदर कंपनी केमिकलची असल्याने भीती व्यक्त केली जात आहे. तूर्तास आग विझवणे शक्य होत नाहीये. आग वाढतच आहे. आजूबाजूच्या कंपनीमध्ये आग पसरत चालल्याची माहिती आहे. अधिकच्या अग्निशमन दलाच्या गाड्या इतर भागातून मागवल्या जात आहेत. आग विझवण्यासाठी शर्थीचे प्रयत्न केले जात आहेत. अद्याप आगीवर नियंत्रण मिळवता आलेले नाही.

जखमींमध्ये महिला, मुलांचा समावेश

मिळालेल्या माहितीनुसार, दुर्घटनेमध्ये पाच ते सहा कामगार जखमी झाले आहेत. परिसरातील काही लोक देखील जखमी झाले आहेत. यात महिला आणि मुलांचा देखील समावेश आहे. जखमींवर एम्स रुग्णालयात उपचार सुरु आहेत. काही किलोमीटर अंतरावर असलेल्या इमारतींच्या काचा फुटल्या आहेत. यावरुन स्फोटाची तीव्रता समजून येईल. धुरामुळे आकाश झाकोळले आहे. म्हात्रे पाडा, सोनार पाडा या भागांना जास्त फटका बसला आहे.

दरम्यान, काही महिन्यांपूर्वीच अशाच प्रकारे एमआयडीसीमधील एका कंपनीत स्फोट झाला होता. सदरच्या घटनेमुळे त्याची आठवण काढली जात आहे.