Mumbai Crime : मंत्रालय क्रेडिट सोसायटी फसवणुकीप्रकरणी 26 आरोपीविरोधात गुन्हा

मुंबई - महाराष्ट्र मंत्रालय क्रेडिट को. ऑप सोसायटी फसवणुकीप्रकरणी 26 आरोपीविरूद्ध मरिन ड्राईव्ह पोलिसांनी फसवणुकीचा गुन्हा दाखल केला आहे. गुन्हा दाखल करण्यात आलेले आरोपी तत्कालीन संचालक मंडळाशी संबंधित असल्याची माहिती मिळत आहेत. बायोमेट्रीक हजेरीत हेरफेर करत 63 लाखांची फसवणूक केल्याचा आरोप त्यांच्यावर आहे.

या प्रकरणी डोंबिवलीचे रहिवासी असलेले सनदी लेखापाल मोहन शंकर मोहिते यांच्या तक्रारीनुसार गुन्हा नोंदविण्यात आला असून पोलीस अधिक तपास करीत आहे. आरोपानुसार, 2 एप्रिल 2022 ते 25 जुलै 2022 दरम्यान ही फसवणूक करण्यात आली आहे.

सहकारी संस्थेत कार्यरत असलेले तत्कालीन संचालक मंडळ आणि अन्य आरोपीनी मिळून संस्थेच्या बायोमेट्रिक हजेरी यंत्रामध्ये बनावट नोंदी केल्या. त्याबाबदल जास्तीचा कामकाज भत्ता घेत 63.33 लाख रुपयांची फसवणूक केल्याचे तक्रारीत म्हटले आहे. त्यानुसार एकूण 26 आरोपीविरुद्ध मरिन ड्राईव्ह पोलिसांनी गुन्हा दाखल केला असून तपास सुरू केला आहे.