Mumbai : लाच प्रकरणी रेल्वे अधिकाऱ्यांवर सीबीआयची कारवाई

मुंबई : सीबीआयने भ्रष्टाचार प्रकरणी मुंबईत कार्यरत रेल्वे अधिकाऱ्याना अटक केली आहे. या कारवाईत पश्चिम रेल्वेचे दोन अधिकारी आणि मध्य रेल्वेच्या एका अधिकाऱ्यासह एकूण पाच आरोपींना अटक करण्यात आली आहे. कंत्राटदारांकडून लाच घेताना आरोपी अधिकाऱ्यांना रंगेहात पकडण्यात आले असून, सर्व रेल्वे अधिकारी हे रेल्वेच्या स्टोअर्स विभागात कार्यरत आहेत.

या अटकेनंतर 12 ठिकाणी सीबीआयकडून शोध मोहीम राबवण्यात आली होती. त्यामध्ये मुंबई, कोलकाता, ग्रेटर नोएडा, जमशेदपूर, अहमदाबाद आणि वडोदरा येथील आरोपींची निवासस्थाने आणि कार्यालयांचा समावेश आहे. या कारवाईत रोख रक्कम, मालमत्तेशी संबंधित कागदपत्रे आणि इतर अनेक पुरावे जप्त करण्यात आले आहेत.या प्रकरणी आणखी काही आरोपींना अटक होण्याची शक्यता आहे.

सीबीआयकडून मिळालेल्या माहितीनुसार, मध्य रेल्वेच्या मटेरियल मॅनेजमेंट डिपार्टमेंटचे (स्टोअर डिपार्टमेंट) डेप्युटी चीफ मटेरियल मॅनेजर एच नारायणन यांना मुंबई मुख्यालयातून अटक करण्यात आली आहे. त्याच्यासोबत समीर देव आणि दीपक जैन या दोन खासगी कंत्राटदारांनाही अटक करण्यात आली आहे. हे दोन्ही कंत्राटदार मेसर्स अर्नेस्ट इवाटा मदरसन प्रायव्हेट लिमिटेड, ग्रेटर नोएडा येथील कंपनीशी संबंधित आहेत. तर पश्चिम रेल्वेच्या ज्या दोन अधिकाऱ्यांना अटक करण्यात आली आहे त्यात मटेरिअल मॅनेजमेंट विभागाचे अतुल शर्मा आणि एच.डी परमार यांचा समावेश आहे. हे दोन्ही अधिकाऱ्यांनी खासगी कंत्राटदारांकडून 70500 रुपयांची लाच घेत असल्याचा आरोप आहे.