Mumbai Fire News: मुंबईच्या काळाचौकी परिसरात आठ सिलेंडरचा मोठा स्फोट, झोपडपट्टीत मोठी आग

मुंबईतील काळाचौकी परिसरातील मिंट कॉलनीमध्ये भीषण आग लागल्याची घटना घडली आहे. सिलेंडरचे आठ ब्लास्ट झाल्याची माहिती आहे. धुराचे लोट हवेत पसरले आहेत. आगीचे कारण अद्याप अस्पष्ट आहे. या आगीमुळे परिसरात धावपळ सुरू झाली आहे. फायर ब्रिगेडच्या गाड्या घटनास्थळी रवाना झाल्या आहेत.

लालबाग काळाचौकी जवळील गिरनार टाॅवरच्या मागील साईबाबा झोपडपट्टीत आग लागली आहे. एकापाठोपाठ एक सिलेंडरचे आठ ब्लास्ट झाल्याची माहिती आहे. जवळपास दिड हजार लोक या झोपडपट्टीमध्ये राहतात. महापालिकेचे आधिकारी कर्मचारी आग अटोक्यात आण्यासाठी प्रयत्न करत आहेत. सिलेंडरच्या स्फोटामागचं कारण अद्याप समजू शकलेलं नाही.

बंद असलेल्या बीएमसीच्या साईबाब पाथ स्कूल या शाळेमध्ये आग लागल्याची माहिती आहे. कोविडमध्ये या शाळेचा वापर केला गेला होता. त्यानंतर ही शाळा बंदच होती. मात्र त्या काळात वापरलेले ऑक्सिजन सिलेंडर तसेच पडून होते.

आग विझवण्यासाठी शर्थीचे प्रयत्न सुरू आहेत. सुदैवाने या आगीत अद्याप कुठलीही जीवितहानी झाली नसल्याची माहिती आहे. बचावकार्यासाठी महापालिकेचे अधिकारी आणि कर्मचारी देखील घटनास्थळी दाखल झाले आहेत. सिलिंडरचा स्फोट कशामुळे झाला, याचे कारण अद्यापही अस्पष्ट आहे.