Central Railway Services Disrupted for Fourth Consecutive Day
esakal
मुंबईसह ठाणे आणि कर्जत परिसरात सुरू असलेल्या मुसळधार पावसाचा मोठा फटका मध्य रेल्वेच्या उपनगरीय सेवेला बसला आहे. सलग चौथ्या दिवशी रेल्वे वाहतूक विस्कळीत झाली आहे. नेरळ-भिवपुरी रेल्वे स्थानकादरम्यान रुळांवर मोठ्या प्रमाणात पाणी साचल्याने बदलापूर ते कर्जत या दरम्यानची लोकल सेवा खबरदारीचा उपाय म्हणून तात्पुरती बंद करण्यात आली आहे. परिणामी सकाळी कामासाठी मुंबईकडे निघालेल्या हजारो प्रवाशांना मोठ्या गैरसोयीचा सामना करावा लागला.
