ऐनवेळी लोकलने बदलला प्लॅटफॉर्म, पोहोचली एक्सप्रेसच्या प्लॅटफॉर्मवर; प्रवाशांची तारांबळ, रेल्वेचे म्हणणे काय?

छत्रपती शिवाजी महाराज टर्मिनस (सीएसएमटी) स्थानकावर बुधवारी दुपारी एक विचित्र प्रकार घडला. कसाऱ्यावरून येणारी जलद लोकल नेहमीप्रमाणे उपनगरीय फलाट क्रमांक ६ वर येणे अपेक्षित असताना ती थेट मेल-एक्स्प्रेस गाड्यांसाठी राखीव असलेल्या फलाट क्रमांक ९ वर दाखल झाली. या अनपेक्षित प्रकारामुळे शेकडो प्रवाशांची एकच तारांबळ उडाली. हीच लोकल दुपारी १२.४४ वाजता सीएसएमटी-टिटवाळा जलद लोकल म्हणून सुटणार असल्याने मोठ्या संख्येने प्रवासी फलाट क्रमांक ६ वर प्रतीक्षा करीत होते. मात्र लोकल फलाट क्रमांक ९ वर आल्याचे समजताच प्रवाशांमध्ये गोंधळाचे वातावरण निर्माण झाले.