Mumbai : मुंबई महापालिका बांधणार सात मलजल प्रक्रिया केंद्रे

मुंबई - मुंबई महानगर पालिकेने मुंबईच्या काही भागात सात मलजल प्रक्रिया केंद्रे बांधण्याचा निर्णय घेतला आहे. या मलजल प्रक्रिया केंद्रांचा आराखडा तयार करण्यात येत असल्याची माहिती पालिका प्रशासनाने दिली आहे.

पालिकेने शंभर टक्के मलनिःसारण वाहिऩ्याच्या सुविधा उपलब्ध करण्याचा निर्धार व्यक्त केला आहे. मुंबईत सद्या 2045 किलोमीटर इतक्या लांबीचे मलनिःसारण वाहिन्यांचे जाळे आहे. सद्या मुंबईच्या एकूण 74.98 टक्के लोकसंख्येला मलनिःसारण सुविधा पुरविली जाते. मलनिःसारण वाहिन्यांच्या जाळ्यांमध्ये सुधारणा करणे आणि काही ठिकाणी मलवाहिन्या नव्याने टाकण्याला यंदा पालिका प्रशासन वेग देणार आहे.

मात्र सात ठिकाणी मलजल प्रक्रिया केंद्रे नव्याने बांधण्याचा निर्णय घेतला आहे. त्याबाबत प्रक्रिया सुरू असल्याची माहिती पालिका प्रशासनाने दिली. ही कामे यंदा प्राधान्याने घेतलेली आहे. धारावी, मालाड, वर्सोवा, घाटकोपर, भांडूप, वांद्रे, वरळी आदी ठिकाणी मलजल प्रक्रिया केंद्रे आहेत. येते मलजलावर प्रक्रिया होते. यात आणखी नवी सात केंद्रे बांधल्यास पर्यावरणासाठी हिताचे होईल, असा विश्वास पालिका प्रशासनाने व्यक्त केला आहे.