मुंबई : रस्ते मोकळे, मोजकीच वाहन रस्त्यांवर

मुंबई - महाविकास आघाडीने सोमवारी पुकारलेल्या महाराष्ट्र बंद ला मुंबईत वाहतुकदारांनीही साथ दिली आहे. टॅक्सी, रिक्षा संघटना अप्रत्यक्षरित्या बंद मध्ये सहभागी झाल्या होत्या. त्यामुळे काहीप्रमाणात रस्ते मोकळे होते. तर मोजक्याच टॅक्सी आणि रिक्षा रस्त्यावर दिसून आल्या, त्यामुळे नौकरदारांना कर्तव्यावर पोहचण्यासाठी त्रास सहन करावा लागला असून, सोमवारचा बंद बऱ्याचप्रमानात यशस्वी झाल्याचे दिसुन आले.

शिवसेना, राष्ट्रवादी आणि काँग्रेस पक्षाच्या महाविकास आघाडीचे कार्यकर्ते सोमवारी रस्त्यांवर पहायला मिळाले. लखीमपूर खेरी प्रकरणात तिन्ही पक्षांकडून निषेध करण्यात आला. शिवडीत काँग्रेस कार्यकर्त्यांनी काळे झंडे दाखवत घटनेचा निषेध केला. शिवाय यामध्ये 75 टक्के पेक्षा रिक्षा, टॅक्सी बंद होत्या तर मालवाहतुकदार सुद्धा बंद मध्ये सहभागी असल्याचे ऑल इंडिया मोटार ट्रान्सपोर्ट काँग्रेसचे अद्यक्ष बल मलकीत सिंग यांनी सांगितले होते. त्याप्रमाणे मुंबईतील व्यापाऱ्यांचा माल सुद्धा बंदमुळे रस्त्यांवर अडकला असल्याचे दिसून आले आहे.

सीएसएमटी रेल्वे स्थानकापुढे दैनंदिन असलेल्या टॅक्सी, रिक्षाची गर्दी सोमवारी दिसून आली नाही. शिवाय लोकल सेवेलाही प्रवाशांची गर्दी नव्हती. दरम्यान शासकीय कार्यालये वगळता खासगी दुकाने, आस्थापना सर्व बंद असल्याने रस्त्यांवर लोकांचीही गर्दी दिसुन आली नसल्याने एकूणच महाविकास आघाडीने पुकारलेला बंद यशस्वी होतांना दिसून आला आहे.