Mumbai : "मुंबईत बॉम्ब ठेवलाय"; माहिती देणाऱ्यालाच पोलिसांनी केली अटक, काय घडलं?

मुंबईतल्या ताज हॉटेलसह काही परिसरात झालेल्या २६/११ च्या हल्ल्यानंतर मुंबई पोलीस अधिक सतर्क झाले आहे. देशाची आर्थिक राजधानी असलेल्या मुंबईत सुरक्षेची अधिक काळजी घेतली जाते. अशातच काल मुंबईत बॉम्ब ठेवल्याची माहिती पोलिसांना मिळाल्याने खळबळ माजली होती. मात्र त्यानंतर पोलिसांनी माहिती देणाऱ्यालाच अटक केली आहे.

'साम'च्या सूत्रांनी दिलेल्या वृत्तानुसार, दिनेश सुतार या सांगलीतल्या तरुणाने काल रात्री मुख्य नियंत्रण कक्षाला फोन केला आणि झवेरी बाजार भागात बॉम्ब ठेवल्याची माहिती दिली. मात्र ही माहिती खोटी असल्याचं पोलिसांना आढळून आलं. त्यानंतर मुंबई पोलिसांनी त्याला अटक केली आहे.

हा तरुण सांगलीतला असून रविवारी रात्री त्याने मुख्य नियंत्रण कक्षाच्या ११२ क्रमांकावर हा फोन केला होता. या तरुणाने दारुच्या नशेत हा फोन केल्याचा प्राथमिक अंदाज पोलिसांकडून व्यक्त केला जात आहे. पोलिसांनी या तरुणाला अटक केली आहे. याप्रकरण लोकमान्य टिळक पोलिस ठाण्यात या तरुणाविरोधात गुन्हा दाखल करण्यात आला आहे.