१५ मार्च रोजी मुंबई विद्यापीठाची सिनेट; चहापानावर सदस्यांचा बहिष्कार

मुंबई : मुंबई विद्यापीठाची (Mumbai university) अधिसभा १५ मार्च रोजी होणार आहे. त्यानिमित्त आज विद्यापीठ प्रशासनाकडून सिनेट सदस्यांसाठी चहापानाचा कार्यक्रम ऑनलाईन पद्धतीने (online) आयोजित करण्यात आला होता. त्यावर युवासेनेच्या सदस्यांनी बहिष्कार टाकला. मुंबई विद्यापीठाच्या इतिहासात प्रथमच अधिसभेपूर्वी ऑनलाईन पद्धतीने चहापानाचा कार्यक्रम (Tea Party Boycott) ठेवण्यात आल्याने त्यावर बहिष्कार टाकल्याची माहिती युवासेनेचे सिनेट सदस्य प्रदीप सावंत यांनी दिली. तसेच अधिसभाही ऑनलाईन घेतली जाण्याची शक्यता असल्याने सिनेट सदस्यांनी (Senate member) आक्षेप नोंदवले आहेत.

राज्यात आणि देशात सर्व व्यवहार सुरळीत सुरू झाले आहेत. शाळा, महाविद्यालये, विद्यापीठ यांचा कारभार ही सुरळीत सुरू असताना विद्यापीठाने सिनेट सदस्यासाठी चहापानाचा कार्यक्रम ऑनलाईन ठेऊन सदस्यांची प्रशासनाने एक प्रकारची थट्टा केल्याचा आरोप सदस्यांकडून केला जात आहे. यावेळी अधिसभा विविध प्रश्नांवर गाजण्याची शक्यता असल्याने तीसुद्धा ऑनलाईन घेऊन विद्यापीठ प्रशासन बचावात्मक भूमिका घेत असल्याचा आरोप सदस्यांकडून करण्यात आला.

अधिसभेत गाजणारे विषय

मुंबई विद्यापीठात आंतरराष्ट्रीय संगीत महाविद्यालय स्थापन करण्याचा मुद्दा अद्यापही अधांतरी राहिला असल्याने या एकाच विषयावर युवासेनेचे सिनेट सदस्य कुलगुरूंना कोंडीत पकडण्याची शक्यता आहे. सुमारे साडेतीन एकर जागेवर झालेल्या अतिक्रमण हटवण्यासाठी पाठपुरावा करण्यास होत असलेली दिरंगाई हा विषयही अधिसभेत गाजण्याची शक्यता असल्याने विद्यापीठाकडून अधिसभा ऑनलाईन आयोजित केली जाण्याची शक्यता सिनेट सदस्यांनी व्यक्त केली.