मुंबईकरांची थर्टीफर्स्ट पार्टी वसईतील किनाऱ्यांवर!

वसई : सरत्या वर्षाला निरोप आणि नववर्षाचे स्वागत करण्यासाठी नागरिक सज्ज झाले आहेत. वसईला विस्तीर्ण समुद्रकिनारा लाभल्याने या ठिकाणी थर्टीफर्स्ट साजरा करण्यास बहुतांश जणांनी पसंती दिल्यामुळे येथील रिसॉर्टची नोंदणी पूर्ण झाली असून, येणाऱ्या पर्यटकांच्या स्वागताची जय्यत तयारी सुरू आहे. दुसरीकडे या सेलिब्रेशनदरम्यान होणारे मद्यपान रोखण्यासाठी पोलिसांची मद्यपींवर करडी नजर राहणार असून नाक्‍यानाक्‍यावर कडक बंदोबस्त असणार आहे.

नववर्षाच्या स्वागतासाठी समुद्री पार्ट्यांना उधान

कळंब, राजोडी, अर्नाळा या समुद्रकिनारी मोठ्या संख्येने रिसॉर्ट आहेत. वसई, मुंबई आणि पालघर जिल्ह्यातून पर्यटक ३१ डिसेंबरला येथे दाखल होणार आहेत. येणाऱ्या नागरिकांच्या सेवेसाठी रिसॉर्ट मालकांनी बॅंड, ऑर्केस्ट्रा अशी व्यवस्था केली असून शाकाहारी आणि मांसाहारी मेजवानीसाठी आतापासूनच तयारी सुरू आहे. कोळी, आगरी तसेच ग्राहकांच्या मर्जीनुसार गीतांचा आनंद घेता येणार आहे, तर जलतरणाचा आनंददेखील लुटता येणार असल्याने विविध प्रकारची रोषणाई करण्यात येणार आहे.

नववर्षाच्या स्वागतासाठी श्रीवर्धनचे किनारे सज्ज

खवय्यांसाठी सुग्रास बेत
मांसाहारी जेवणात समुद्रातील पापलेट, हलवा यासह विविध जातीचे ताजे मासे, गावठी कोंबडी, शाकाहारी पदार्थात पालक-पनीर यासह हिरव्या भाज्यांचा आस्वाद खवय्यांना घेता येणार आहे. यासाठी नोंदणी करतानाच अशा प्रकारे शाकाहारी, मांसाहारी व्यक्तीची ऑर्डर घेण्यात आली आहे.

वाहनांची कसून तपासणी
रस्त्यांवरून धावणारी वाहने, समुद्रकिनारी मद्यप्राशन करून घातला जाणारा धिंगाणा, अनुचित प्रकार रोखण्यासाठी वसई तालुक्‍यातील पोलिसांचा बंदोबस्त असणार आहे. वाहनांची कसून तपासणी केली जाणार आहे. 

थर्टीफर्स्टला नागरिकांची हॉटेलमध्ये गर्दी असते, म्हणून अगोदरच कोंबड्या आणून ठेवल्या आहेत. ग्राहकांच्या पसंतीचे मासेदेखील उपलब्ध व्हावेत म्हणून प्रयत्न चालू आहेत. तसेच हॉटेलला रोषणाई करण्यात आली आहे.

- विरेंद्र पाटील, हॉटेल व्यावसायिक, वसई. 

रिसॉर्टमध्ये गेल्या वर्षापेक्षा यंदा चांगली नोंदणी झाली आहे. मुंबईपासूनच्या नागरिकांनी आधीच नोंदणी केली आहे. येणाऱ्या नागरिकांना चांगल्या सोई-सुविधा मिळाव्यात, यावर भर दिला जात आहे. लहान मुलांसाठी खेळणीदेखील ठेवण्यात आली आहेत.
- धीरज निजाई, रिसॉर्ट मालक, नालासोपारा.