Mumbai News: मुंबईचे नवे मनपा आयुक्त डॉ. भूषण गगराणी नक्की आहेत तरी कोण?

Mumbai News: मुंबई महानगरपालिकेचे नवे आयुक्त म्हणून डॉ. भूषण गगराणी यांनी पालिका आयुक्त डॉ. इकबाल सिंह चहल यांच्याकडून आज सायंकाळी पदभार स्वीकारला.

शासनाने आपली बदली केली असून मुंबई महापालिकेच्या आयुक्त पदाचा कार्यभार स्वीकारावा असे पत्र राज्याचे अप्पर मुख्य सचिव (सेवा) नितीन गद्रे यांनी आज तातडीने गगराणी यांना पाठविले. गगराणी आजच आयुक्तपदावर नियुक्त झाले. (mumbai news)

केंद्रीय निवडणुक आयोगाने आयुक्त इक्बाल सिंग चहल यांची बदली करण्याचे आदेश दिले होते. आज राज्य सरकारने गगराणी यांना तातडीने पदभार स्वीकासण्यात कळविले.

त्यानुसार त्यांनी पदभार स्वीकारला आहे. अतिरिक्त आयुक्त डॉ. अश्विनी जोशी, डॉ. अमित सैनी, अभिजित बांगर, डॉ. सुधाकर शिंदे, सह आयुक्त मिलिन सावंत, रमेश पवार, चंद्रशेखर चोरे आदींसह महानगरपालिकेचे विविध वरिष्ठ अधिकारी यावेळी उपस्थित होते.

डॉ. गगराणी हे भारतीय प्रशासन सेवेतील सन १९९० च्या तुकडीचे अधिकारी आहेत. संपूर्ण भारतातून तिस-या क्रमांकाने आणि मराठी भाषा घेवून उत्तीर्ण होणारे ते देशातील पहिलेच सनदी अधिकारी (आयएएस) आहेत.

• कोल्हापूर येथील शिवाजी विद्यापीठातून वाणिज्य शाखेची पदव्युत्तर पदवी तसेच इतिहास या विषयातही कला शाखेची पदव्युत्तर पदवी त्यांनी संपादीत केली आहे. यासह डॉ. गगराणी यांनी नागपूर विद्यापीठातून विधी शाखेची पदवीही संपादन केली आहे.

• तर लंडन येथील बर्मिंगहॅम विद्यापीठातून प्रशासन या विषयातून त्यांनी व्यवस्थापन शाखेची पदव्युत्तर पदवी (एमबीए) संपादन केली आहे. मुंबई विद्यापीठातून व्यवस्थापन या विषयात त्यांनी विद्यावाचस्पती (पीएच. डी.) पदवी मिळविली आहे.

• प्रशासकीय सेवेत प्रवेश केल्यानंतर गगराणी यांनी सुरुवातीची दोन वर्षे भूमी महसूल व्यवस्थापन आणि जिल्हा प्रशासन, विकास प्रशासन या संदर्भातील कामकाज पाहिले.

• छत्रपती संभाजी नगर (औरंगाबाद) येथे जिल्हा परिषदेचे मुख्य कार्यकारी अधिकारी, पुणे येथे युवक कल्याण आणि क्रीडा विभागाचे संचालक, सिंधुदुर्ग येथे जिल्हाधिकारी म्हणून कामकाम पाहिले.

• त्यानंतर मुख्यमंत्री सचिवालयात उप सचिव, महाराष्ट्र औद्योगिक विकास महामंडळाचे सह मुख्य कार्यकारी अधिकारी, महाराष्ट्र पर्यटन विकास महामंडळाचे सचिव, वैद्यकीय शिक्षण व औषधी द्रव्ये विभागाचे सचिव, सार्वजनिक आरोग्य विभागाचे सचिव महाराष्ट्र औद्योगिक विकास महामंडळाचे मुख्य कार्यकारी अधिकारी, शहर आणि औद्योगिक विकास महामंडळाचे (सिडको) व्यवस्थापकीय संचालक अशा निरनिराळ्या पदांची धुरा सांभाळताना त्यांनी आपल्या कार्याचा विशेष ठसा उमटविला.

• त्यानंतर मुख्यमंत्री कार्यालयात प्रधान सचिव आणि नगर विकास विभागात प्रधान सचिव म्हणून देखील त्यांची नियुक्ती करण्यात आली.

• मुंबई महानगरपालिकेत नियुक्त होण्यापूर्वी डॉ. भूषण गगराणी मुख्यमंत्री कार्यालयात अतिरिक्त मुख्य सचिव या पदावर कार्यरत होते

• . तसेच त्यांच्याकडे नगरविकास, जलसंपदा आणि मराठी भाषा या विभागांची देखील जबाबदारी होती.