पालघर साधु हत्या प्रकरण : अठरा पोलिसांवर सरकारकडून कारवाई

मुंबई, ता. 7 : पालघरमधील साधुंच्या हत्येबाबत राज्य सरकारने आतापर्यंत एकूण 18 पोलिसांवर कारवाई केली आहे, अशी माहिती प्रतिज्ञापत्राद्वारे आज सर्वोच्च न्यायालयात देण्यात आली.

राज्य सरकारने एका पोलिस अधिकाऱ्याला पदच्युत केले आहे. तर दोघांना सक्तीची निव्रुत्ती दिली आहे. याचबरोबर पंधरा जणांवर वेतन कपातीची कारवाई केली आहे. पालघरमध्ये दोन साधूंसह तिघांची जमावाने दगडाने ठेचून हत्या केली होती. याप्रकरणी सीबीआय तपासणी केली जावी अशी मागणी शशांक झा यांनी सर्वोच्च न्यायालयात केली आहे. या मागणीला विरोध करणारे पुरवणी प्रतिज्ञापत्र सरकारकडून आज दाखल करण्यात आले. यामध्ये तपासाचा कृती अहवाल देखील दाखल करण्यात आला.

महत्त्वाची बातमी : तब्बल ९ अटींवर रिया चक्रवर्तीला झाला जामीन मंजूर, अटींची पूर्तता न झाल्यास रद्द होऊ शकतो जामीन

राज्य सरकारने याप्रकरणी विभागीय चौकशी केली असून संबंधित कर्मचाऱ्यांना कारणे दाखवा नोटीस बजावली आहे. तसेच 252 जणांविरुद्ध आरोपपत्र दाखल केले आहे. पुण्यातील गुन्हा तपास विभागाने तपास केल्यानंतर यामध्ये पालघर आणि ठाणे बाल न्यायालयात दोन आरोपपत्र दाखल केले आहे.

न्यायालयाने या प्रतिज्ञापत्रावर बाजू मांडण्यासाठी अन्य पक्षकारांना अवधी दिला आहे. याचिकेवर पुढील सुनावणी दिनांक 15 नोव्हेंबररोजी होणार आहे.

( संपादन - सुमित बागुल )

palghar lynching case maharashtra state government took action on 18 policemen