भिवंडी मेट्रो प्रकल्पात विरोधाचे सूर 

भिवंडी : भिवंडी पालिका कार्यक्षेत्रात प्रस्तावित मेट्रो मार्ग-5 ठाणे-भिवंडी-कल्याण या प्रकल्पातच्या अनुषंगाने पालिकेत प्राप्त झालेल्या 6 हजार हरकती तसेच सूचना अर्जांवर पालिकेच्या नगररचना विभाग व आयुक्तांनी सुनावणी घेतली. या सुनावणीमध्ये शहरातील कल्याण रोड मार्गावर राहणारे रहिवासी व व्यापाऱ्यांनी 6 हजार हरकती व सूचना अर्ज दाखल केले होते. त्यापैकी सुमारे 1 हजार 40 नागरिकांनी मेट्रोच्या मार्गास विरोध तर, सुमारे 5 हजार नागरिकांनी या मार्गास सकारात्मक भूमिका दाखविली आहे. 

मोदींची पुन्हा छत्रपतींशी तुलना

भिवंडी शहरातील नागरिकांना दळणवळणाचे साधन सुलभपणे व्हावे यासाठी खासदार कपिल पाटील यांच्या मागणीनुसार राज्य सरकारने मेट्रो प्रकल्प भिवंडीत राबविण्याचे काम सुरू केले आहे. सध्या मेट्रो मार्गाच्या सर्व्हेक्षणाचे काम पूर्ण झाले आहे. ठाण्यातील कापुरबावडी येथून सुरू होणारा मेट्रो रेल्वे मार्ग बाळकूम, कशेळी, काल्हेर, पुर्णा, अंजूरफाटा, धामणकरनाका, राजीव गांधी चौकापासून कल्याण रोडकडे वळण घेऊन पुढे टेमघर, रांजणोली, गोवेगाव, दुर्गाडी ते कल्याणमधील एमपीएमसीपर्यंत नेण्यात येणार आहे. हा मेट्रो रेल्वेमार्ग 24 किलोमीटर लांबीचा असून त्याकरिता 8 हजार 416 कोटी रुपयांचा खर्च येणार आहे. 

ठाण्यातील भाजप नगरसेवकाला भोवलं खंडणी प्रकरण, कोर्टाने सुनावली कोठडी

भिवंडी शहरातील धामणकर नाका ते कल्याण रोड, गोपालनगर, टेमघर, साईबाबा मंदिर, रांजणोली, कोनगावमार्गे हा मेट्रो मार्ग कल्याणच्या दिशेने जाणार आहे. त्यामुळे एमएमआरडीएने कापूरबावडी, कशेळी, काल्हेर, पूर्णा, कोपर ते राहणाळ गांवपर्यंत रस्त्यावर काम सुरू केले आहे. हा प्रकल्प राबविण्यासाठी रस्ता रूंदीकरण केले जाणार आहे. त्यामुळे अनेक दुकाने, इमारती व घरे तोडली जाणार आहेत. या पार्श्‍वभूमीवर भिवंडीतील कल्याण रोड मार्गच्या दुहेरी बाजूला राहणारे बाधित नागरिक व दुकानदार व्यापाऱ्यांनी संघर्ष समिती स्थापन करून कल्याण रोड मार्गाने जाणाऱ्या मेट्रो मार्गाला विरोध दर्शविला आहे. 

महिनाभरात निर्णयाची शक्‍यता 
सदर मेट्रो मार्ग वंजारपट्टी मार्गाने नेण्यात यावा, अशी समितीची मागणी आहे. ही मागणी लक्षात घेऊन सरकार व एमएमआरडीएच्या सूचनेवरून भिवंडी पालिका प्रशासनाने मेट्रोबाधित नागरिकांकडून हरकती व सूचना मागविण्यासाठी सुमारे 6 हजार बाधित रहिवाशांना महिनाभरापूर्वी नोटिसा दिल्या होत्या. या नोटिसीवर आयुक्त डॉ. प्रवीण आष्टीकर यांच्या उपस्थितीत महापालिकेच्या दालनात लेखी हरकती व सूचना अर्जावर सुनावणी घेण्यात आली. आयुक्तांनी या हरकती व सूचनांबाबतचा गोपनीय अहवाल सरकारकडे पाठविला आहे. त्यामुळे येत्या महिनाभरात मेट्रो मार्गाबाबत निर्णय होण्याची शक्‍यता आहे.