Baba Siddique: बाबा सिद्दिकी हत्या, आरोपीस पुण्यातून अटक; हत्येप्रकरणी २७वा आरोपी अटकेत

मुंबई : बहुचर्चित बाबा सिद्दीकी हत्या प्रकरणात सहभागी असलेल्या अमोल गायकवाड या तरुणास मुंबई गुन्हे शाखेने पुण्यातून बुधवारी (ता. २७) अटक केली.

या गुन्ह्यासाठी अर्थसहाय्य पुरविण्यापासून प्रमुख आरोपी शुभम लोणकर यास पळून जाण्यास सर्वतोपरी सहकार्य केल्याचा आरोप अमोलविरोधात आहे. गुरुवारी विशेष मकोका न्यायालयाने अमोलला ८ सप्टेंबरपर्यंत पोलिस कोठडीत ठेवण्याचे आदेश दिले आहेत. अमोल या प्रकरणात अटक झालेला २७वा आरोपी आहे.

सिद्दीकी यांच्या हत्येचा कट आखण्यासाठी लोणकर याने घेतलेल्या बैठकांना अमोल हजर होता. वाघोली परिसरात राहणाऱ्या आणि भंगार विक्रीचा व्यवसाय करणाऱ्या अमोलने या गुन्ह्यासाठी आरोपींना अर्थसहाय्य पुरविले.

सिद्दीकी यांच्या हत्येआधी आणि नंतरही लोणकरसह अन्य आरोपी अमोलच्या संपर्कात होते. लोणकर यास पुण्यातून पसार होण्यास आणि पोलिसांच्या हाती न लागता दडून राहण्यास सर्वतोपरी सहकार्य केल्याचा अमोलवर आरोप ठेवण्यात आला आहे.