वीज पडण्याचा धोका कमी करण्यासाठी ठाणे जिल्ह्यात उभारण्यात येणार वीज प्रतिरोधक यंत्रणा

ठाणे : पावसाच्या कालावधीत अनेकदा वीज पडून माणसांसह जनावरांचा देखील बळी जात आहे. तर, अनेकदा परतीच्या पावसामुळे मोठ्या प्रमाणात नैसर्गिक आपत्ती ओढवली जात असते. याची गांभीर्याने दाखल घेत, शासनाच्या सूचनेनुसार ठाणे जिल्ह्यात 365 ठिकाणी वीज प्रतिरोधक यंत्र (लायटनिंग अरेस्टर) बसविण्यात येणार आहे. राष्ट्रीय चक्रीवादळ धोके निवारण प्रकल्पांतर्गत ही योजना आखण्यात आली आहे. त्याबाबतचा प्रस्ताव तयार करून जिल्हा प्रशासनाने शासनाकडे पाठविण्यात आला असल्याची माहिती जिल्हा प्रशासनाच्या वतीने देण्यात आली. 

महत्त्वाची बातमी : संजय राऊत आणि कुणाल कामरा यांची भेट, सोशल मीडियावर फोटो शेअर

ठाणे जिल्ह्यात चक्रीवादळ प्रभावी क्षेत्रात येत असल्याने या वादळांमुळे होणारे नुकसान कमी करण्यासाठी उपाययोजना केल्या जात आहेत. भूमिगत विद्युतीकरण, किनारपट्टीलगत झाडांची लागवड अशा योजना राष्ट्रीय चक्रीवादळ धोके निवारण प्रकल्पांतर्गत राबविण्यात येत आहेत. वीज प्रतिरोधक यंत्रणा हा देखील याचाच एक भाग आहे. यंदा आलेल्या निसर्ग चक्रीवादळामुळे मोठ्या प्रमाणात झालेले नुकसान व निष्पाप जीव गेल्यानंतर शासनाकडून कोकण किनारपट्टीवरील पाच जिल्ह्यांमध्ये राष्ट्रीय चक्रीवादळ धोके निवारण प्रकल्पांतर्गत वीज प्रतिरोधक यंत्रणा (लायटनिंग अरेस्टर) उभारण्याचा निर्णय घेण्यात आला. त्यानुसार प्रत्येक जिल्ह्याला प्रस्ताव सादर करण्याच्या सूचना शासनाकडून करण्यात आल्या. त्यानुसार ठाणे जिल्ह्यातील सात तालुक्‍यांमध्ये 365 ठिकाणी वीज प्रतिरोधक यंत्रणा (लायटनिंग अरेस्टर) उभारण्याचा प्रस्ताव शासनाकडे सादर केला. 

नक्की वाचा : कंगनाच्या ऑफिस पाडकामाची सुनावणी पूर्ण; न्यायालयाने निर्णय ठेवला राखून 

दरम्यान, वीज पडण्याची शक्‍यता असलेल्या ठिकाणी वीज प्रतिरोधक यंत्रणा बसवण्यासाठी अल्प स्वरूपात खर्च येणार आहे. यासाठी ग्रामपंचायत कार्यालये, बस स्थानक अशा ठिकाणी ही यंत्रणा बसवण्यात येणार आहे. यासाठी 50 हजारांची खर्चाची मर्यादा देखील देण्यात आली आहे. तर, रस्त्याच्या कडेला व शासकीय जागेत निवारा बांधून त्यावर यंत्रणा उभारण्यासाठी 5 लाखापर्यंतची मर्यादा असणार आहे. तसेच ही यंत्रणा उभारल्यानंतर या परिसरात वीज कोसळली, तरी वीज प्रतिरोधक यंत्रणा आपल्याकडे वीज खेचून घेईल, त्यानंतर त्या प्रणालीच्या माध्यमातून जमिनीमध्ये वीज प्रवाह वळवला जातो. त्यामुळे वीज पडण्याच्या घटना कमी होऊन नुकसान टाळता येणे शक्‍य होणार आहे. 

ही योजना प्राथमिक पातळीवर आहे. या संदर्भात अहवाल मागवण्यात आला आहे. त्यानुसार निवड होणाऱ्या ठिकाणी ही यंत्रणा बसवण्यात येणार आहे. मोठया इमारती, कारखाने, मोबाइल टॉवर अशा ठिकाणी अशी यंत्रणा बसवलेल्या असतात. राष्ट्रीय चक्रीवादळ धोके निवारण प्रकल्पांतर्गत ही यंत्रणा जीथे वारंवार वीज पडून दुर्घटना घडते. तसेच गर्दीची ठिकाणे, संवेदनशील विद्युत, संपर्क केंद्रे, शासकीय कार्यालय, प्राथमिक आरोग्य केंद्र, बस स्थानक, ग्रामपंचायत कार्यालय, पोलिस स्टेशन अशा विस्तृत परिसरात बसवली जाणार आहे. 
- अनिता जवंजाळ, आपत्ती व्यवस्थापन अधिकारी, ठाणे. 

7 तालुक्‍यात उभारणार वीज प्रतिरोधक यंत्रणा 

तालुका ठिकाणे - संख्या 
* ठाणे - 38 
* कल्याण - 16 
* भिवंडी - 09 
* अंबरनाथ - 34 
* उल्हासनगर - 13 
* मुरबाड - 126 
* शहापूर - 127 

(संपादन : वैभव गाटे)

to reduce lightning strike an electrical resistance system will be set up in thane