Shivdi-Nhava Sheva sea link Toll: अटल सेतुवरून प्रवास करणाऱ्या हलक्या वाहनांचा टोल नेमका किती ? आज होणार निर्णय

Shivdi-Nhava Sheva sea link : मुंबई ट्रान्स हार्बर लिंकवरून प्रवास करणाऱ्या हलक्या वाहनांसाठी (मोटार) ३५० रुपये एवढा टोल भरावा लागणार आहे. त्यासाठी नवी मुंबईतील उलवे गावाजवळील शिवाजीनगर आणि चिलें (गव्हाण) या दोन ठिकाणी (Toll Naka) पथकर नाके उभारण्याचे प्राधिकरणाद्वारे निश्चित करण्यात आले आहेत.

मंत्रिमंडळाच्या बैठकीत यावर अंतिम मंजुरी घेण्यात येणार आहे. भारतातील सर्वात लांब पूल म्हणून ओळखल्या जाणाऱ्या ट्रान्स हार्बर लिंक चे नामकरण 'अटल सेतू' असे करण्यात आले आहे. मुंबईतून नवी मुंबई आणि उरण, विस्तारित पुण्याचा काही भाग, अलिबाग यांना जोडणारा हा मार्ग लवकरच लोकांसाठी खुला करण्यात येणार आहे.

मुंबई महानगर विकास प्राधिकरणाच्या (एमएमआरडीए) वतीने हे बांधकाम झाले आहे. एमएमआरडीएच्या प्रस्तावानुसार ५०० रुपयांचा टोल प्रस्तावित केला होता. मात्र नगर विकास विभागाने यात हस्तक्षेप करून तो ३५० रुपयांवर आणला आहे.

या पुलाच्या बांधकामासाठी जपान येथील जायका या कंपनीने अर्थसहाय्य उपलब्ध करून दिले असल्याने त्यांच्या आर्थिक नियोजनाच्या पाश्र्वभूमीवर 'एमएमआरडीए' ने टोलची रक्कम निश्चित केली होती.

शिवडी ते न्हावाशेवा पूल सुमारे २२ कि.मी. लांबीचा प्रकल्प आहे. 'अटलबिहारी वाजपेयी शिवडी-न्हावाशेवा अटल सेतू' असे प्रकल्पाचे नामकरण प्रकल्पाच्या १७ हजार ८४३ कोटी रुपयांच्या खर्चास सरकारकडून मान्यता देण्यात आली.