मुंबई : मेट्रो स्थानकाच्या नावांत बदल; शिंपोलीचा राजपत्रात उल्लेख

मुंबई : शिवसेनेच्या (shivsena) दणक्यामुळे बोरिवली पश्चिमेकडील मंडपेश्वर मेट्रो स्थानकाचे (Mandapeshwar metro station) नाव आता मंडपेश्वर-आय सी कॉलनी, तर पहाडी-एक्सर मेट्रो स्थानकाचे नाव शिंपोली स्थानक (Shimpoli railway station) करण्यात येणार आहे. म्हाडा सभापती विनोद घोसाळकर (vinod ghosalkar) यांनी शनिवारी (ता. ५) एमएमआरडीए (MMRDA) आयुक्त एस. श्रीनिवासन यांची भेट घेऊन याबाबत चर्चा केली. त्यानंतर श्रीनिवासन यांनी संबंधित अधिकाऱ्यांना याबाबतचे निर्देशही दिले.

यापूर्वीही विनोद घोसाळकर यांच्यामुळे दहिसर पूर्वेकडील अप्पर दहिसर मेट्रो स्थानकाचे नाव आनंदनगर असे करण्यात आले होते. दहिसर प्रभाग क्रमांक एकच्या शिवसेना नगरसेविका तेजस्वी घोसाळकर यांनी स्थानिक जनतेच्या मागणीनुसार मंडपेश्वर मेट्रो स्थानकाचे नाव मंडपेश्वर आय सी कॉलनी करण्याची मागणी राज्याचे पर्यावरणमंत्री आदित्य ठाकरे यांच्याकडे केली होती; तर पहाडी एक्सर स्थानकाचे नाव बदलून त्याला शिंपोली नाव देण्याची मागणी गावदेवी ग्रामस्थ मंडळाने घोसाळकर यांच्याकडे केली होती. त्यानुसार आता ही नावे बदलली जातील, असे मुंबई बँक संचालक अभिषेक घोसाळकर यांनी सांगितले.

शिंपोलीचा राजपत्रात उल्लेख...

दहिसर पूर्व डी एन नगर अंधेरी या मेट्रो मार्गातील स्थानकाला मंडपेश्वर असे नाव देण्यात आले होते. पण या ठिकाणाहून मंडपेश्वर विभाग तीन किलोमीटर दूर असून हा परिसर आय सी कॉलनी म्हणून ओळखला जातो. तसेच शिंपोली या गावाला इतिहास असून भारतीय राजपत्रात त्याचा उल्लेखही करण्यात आला आहे. त्यामुळे स्थानकांना स्थानिक नावे देण्याची मागणी करण्यात आली होती.