पडीक विहिरीत पडलेल्या रानडुकरांच्या पिल्लांना जीवदान

पडीक विहिरीत पडलेल्या रानडुकराच्या पिल्लांना जीवदान
पाली, ता. ३ (वार्ताहर) ः वाढत्या उन्हात पाण्यासाठी वन्यजीवांची मोठ्या प्रमाणात भटकंती सुरू आहे. असेच पाण्याच्या शोधामध्ये सुधागड तालुक्यातील वाकणवाडी गावातील बसस्टॉपजवळील एका जुन्या पडक्या विहिरीमध्ये दोन रानडुकराची पिल्ले पडली होती. वन विभाग, स्थानिक वन्यजीव रक्षक व सह्याद्री वन्यजीव रक्षणार्थ सामाजिक संस्था यांनी रानडुकराच्या पिल्लांना शिताफीने पकडून सुखरूप नैसर्गिक अधिवासात सोडून दिले आहे.
सध्या उन्‍हाचा कहर वाढला आहे. त्‍यामुळे नागरिकांसह वन्यप्राण्यांना उष्णतेच्या त्रासाला सामोरे जावे लागत आहे. अशातच पशु-पक्ष्यांना पाण्यासाठी भटकंती करावी लागत आहे. जंगलातील अनेक पाणवठे सध्या उन्‍हामुळे कोरडे पडले आहेत, तर गावातील विहिरीदेखील खोल गेल्या असून, पाणी मोठ्या प्रमाणात आटले आहे. अशातच पाण्याच्या शोधामध्ये सुधागड तालुक्यातील वाकणवाडी गावातील बसस्टॉपजवळील एका जुन्या पडक्या विहिरीमध्ये दोन रानडुकराची पिल्ले पडली होती. या रानडुकराच्या पिल्लांना तेथून बाहेर पडणे अशक्य होते. पालीतील वन्यजीव रक्षक शंतनू लिमये यांना रविराज परदेशी यांनी विहिरीमध्ये रानडुकराची पिल्ले पडली असल्याची माहिती दिली. त्यानंतर शंतून लिमये व अमित निंबाळकर यांनी वनविभाग कर्मचारी संदीप ठाकरे व अविनाश पाटील तसेच सह्याद्री वन्यजीव रक्षणार्थ सामाजिक संस्थेच्या सदस्यांना याबाबतची माहिती दिली. दरम्यान, काही वेळातच संबंधित व्‍यक्‍तींकडून या रानडुकरांना सुखरूप बाहेर काढण्यात आले.