‘नारीशक्ती दूत’ ॲप चालेना!

सकाळ वृत्तसेवा
मुंबई, ता. ३० : लाडकी बहीण योजनेचे  नारीशक्ती दूत  ॲप  चालेनासे झाले आहे. योजनेचे अर्ज अपलोड करण्यात अडचणी येत असल्याचा दावा करून मुंबई उच्च न्यायालयात जनहित याचिका दाखल करण्यात आली आहे. न्यायालयाने या याचिकेची दखल घेत सरकारला प्रतिज्ञापत्र सादर करण्याचे निर्देश दिले आहेत. पुढील सुनावणी ७ ऑक्टोबरपर्यंत तहकूब करण्यात आली आहे.

लाडकी बहीण योजनेसाठी ऑनलाइन अर्ज करण्याचा शेवटचा दिवस उजाडूनही ऑनलाइन नोंदणी सुरळीत झालेली नाही. योजनेला होत असलेला विरोध, तसेच ४६ हजार कोटींच्या तरतुदीवर कॅगने ठेवलेले बोट या पार्श्वभूमीवर  लाडकी बहीण योजना बंद होणार  का, असा सवाल करून बोरिवलीतील प्रमेय फाउंडेशनतर्फे ॲड. रुमाना बगदादी यांनी मुंबई उच्च न्यायालयात जनहित याचिका दाखल केली आहे. या याचिकेवर आज (ता. ३०) न्या. देवेंद्रकुमार उपाध्याय आणि न्या. अमित बोरकर यांच्या खंडपीठासमोर सुनावणी घेण्यात आली. लाडकी बहीण  योजनेचे नारीशक्ती दूत  ॲप सुरुवातीपासून नीट चालत नव्हते. जुलैच्या शेवटच्या आठवड्यापासून  ॲप ठप्प झाले आहे, असे याचिकाकर्त्याचे म्हणणे आहे.
----
दोन कोटी महिलांची नोंदणी!
लाडकी बहीण योजनेची ऑनलाइन नोंदणी ढेपाळली असताना अंगणवाडी सेविका तसेच पालिकेच्या वॉर्डमधील कर्मचारी ऑफलाइन अर्ज स्वीकारत नाहीत, असा दावा याचिकाकर्त्यांनी केला आहे. त्यावर  योजनेचे संकेतस्थळ पूर्ण क्षमतेने सुरू असल्याची माहिती  महाधिवक्ता बीरेंद्र सराफ यांनी दिली. तसेच, आतापर्यंत दोन कोटींहून अधिक महिलांनी नोंदणी केल्याची  माहिती त्यांनी दिली.