Crime News: ३.४४ कोटींच्या फसवणुकीप्रकरणी दोन बंधूंना अटक!

Andheri Cirme: शहरातील एका नामांकित कंपनीची तीन कोटी ४४ लाख रुपयांची फसवणूक केल्याप्रकरणी अमित भगवान वाधवानी, विकी भगवान वाधवानी या दोन बंधूंना मालवणी पोलिसांनी अटक केली. त्‍यांना बोरिवलीतील स्‍थानिक न्यायालयाने पोलिस कोठडी सुनावली आहे.

घाटकोपरला राहणारे भरत मावोजी शहा हे खाजगी कंपनीत कामाला आहेत.

बीकेसी येथे या कंपनीचे कार्यालय आहे. रियल इस्टेट व्यवसायाशी संबंधित ही कंपनी २००८ साली संचालक अमर सोलंकी, उज्ज्वल राणे यांनी सुरू केली होती. २०१९ साली कंपनीच्या संचालकांची अमित, विकी आणि ललित टेकचंदानी यांच्याशी ओळख झाली होती.

यातील अमित आणि विकी हे दोघेही साई इस्टेट कन्सल्‍टंट चेंबूर प्रायव्हेट लिमिटेड कंपनीत संचालक, तर ललित हा त्यांचा काका आहे.

मार्च २०२१ मध्ये या तिघांनी त्यांच्याकडे व्यवसाय वाढीसाठी दोन कोटींची मागणी केली होती. त्यांच्या कंपनीने तीन वर्षांसाठी २४ टक्के व्याजदराने दोन कोटी रुपयांचे कर्ज दिले.

तीन वर्षांनंतर कंपनीला मुद्दल दोन कोटी आणि व्याजापोटी ४८ लाख रुपये येणे अपेक्षित होते. वारंवार मागणी करूनही तिघांनी पैसे परत केले नाहीत.

कंपनीच्या वतीने भरत शहा यांनी मालवणी पोलिसांत तक्रार केली होती. तक्रारीची वरिष्ठ पोलिस निरीक्षक चिमाजी आढाव यांनी गंभीर दखल घेत आरोपींच्या अटकेसाठी विशेष मोहीम हाती घेण्याचे आदेश दिले होते.