होम प्लॅटफॉर्मवरुन जीवघेणी धावपळ

होम प्लॅटफॉर्मवरून जीवघेणी धावपळ
नोकरीच्या पहिल्याच दिवशी प्रवाशांचा संताप
बदलापूर, ता. २१ (बातमीदार) : बदलापूर रेल्वेस्थानकावर सरकते जिने, लिफ्ट, डेकचे काम करण्यासाठी फलाट क्रमांक एकवर लोखंडी कुंपण घालून हे फलाट प्रवासासाठी बंद केले आहे. मध्य रेल्वे प्रशासनाने शनिवारी (ता. १९) रात्री ब्लॉक घेऊन हे काम केल्यानंतर सोमवारी (ता. २१) आठवड्याच्या पहिल्याच दिवशी प्रवाशांची गैरसोय झाली. नोकरीचे ठिकाण गाठण्यासाठी होम प्लॅटफॉर्मवरून ट्रेन पकडताना झालेल्या गर्दीमुळे प्रवाशांमध्ये संतापाची लाट उसळली. फलाट क्रमांक एक बंद करण्याचा मध्य रेल्वे प्रशासनाचा निर्णय प्रवाशांच्या जीवावर उठणारा आहे. त्यामुळे रेल्वे प्रशासनाने हा निर्णय मागे घेण्याची मागणी प्रवासी करत आहे.

बदलापूर स्थानकाचे अद्ययावतीकरण करण्याचे काम मध्य रेल्वे प्रशासनाकडून सुरू आहे. या कामासाठी बदलापूर रेल्वेस्थानकात १२ मीटर लांबीचा बंदिस्त डेक आणि या डेकवरून फलाटावर उतरण्यासाठी चढण्यासाठी सरकते जिने, लिफ्ट, पादचारी पुलाची सुविधा देण्यात येणार आहे. या कामासाठी फलाटावरील जागा अपुरी पडत असल्याचे कारण देत रेल्वे प्रशासनाने शनिवारी (ता. २०) मध्यरात्री विशेष ब्लॉक घेऊन फलाट क्रमांक एक हा कुंपण घालून कायमस्वरूपी बंद केला. त्यामुळे बदलापूर स्थानकातून मुंबई छत्रपती शिवाजी महाराज टर्मिनसकडे सुटणाऱ्या लोकलमध्ये फलाट क्रमांक एक आणि होम प्लॅटफॉर्म दोन्हीकडून चढणे जिथे शक्य होत होते; मात्र तिथे फलाट क्रमांक एक बंद झाल्याने फलाट क्रमांक एक ए वरून हा प्रवास करावा लागणार आहे. यामुळे प्रवाशांनी समाजमाध्यमांवर नाराजी व्यक्त केली होती.

आठवड्याच्या पहिल्याच दिवशी सोमवारी समाजमाध्यमांवरील लोकांच्या संतप्त प्रतिक्रियेनंतर सकाळच्या वेळेत प्रवास करताना फलाटावर कोणताही अनुचित प्रकार घडू नये, यासाठी स्थानिक पोलिसांची रेल्वे प्रशासनाने मदत घेतली होती. या वेळी प्रवाशांनी कोणतेही आंदोलन केले नसले तरी फलाट क्रमांक एक बंद झाल्याने ट्रेन पकडण्यासाठी होम प्लॅटफॉर्मवर मोठ्या प्रमाणात गर्दी झाली होती. त्यात जागा अरुंद असल्याने लोकलमध्ये चढता-उतरताना बदलापूरकरांचे अतोनात हाल झाले. अनेकांनी हा निर्णय बदलापूरकरांच्या जीवावर बेतणारा असून, निर्णय मागे घ्यावा, फलाट क्रमांक एकवरील कुंपण हटवण्याची मागणी केली.

बदलापूरहून लोकलने प्रवास करणाऱ्या प्रवाशांची संख्या मोठी आहे. त्यातच कोणतीही पूर्वसूचना किंवा कल्पना न देता मध्य रेल्वेने फलाट क्रमांक एकवर कुंपण टाकून बंद केला आहे. त्यामुळे फलाट क्रमांक एक ए अर्थात होम प्लॅटफॉर्मवर प्रवाशांची दुपटीने गर्दी होत आहे. आधी दोन्ही बाजूंनी ट्रेन पकडताना गर्दीवर नियंत्रण येत होते; मात्र आता सकाळी गर्दीच्या वेळेत ट्रेन बदलापूर स्थानकात उशिरा आली, तर या एकाच प्लॅटफॉर्मवरून ट्रेन पकडताना होणाऱ्या धरपकडीत मोठा अपघात होण्याची शक्यता नाकारता येत नाही.
- अक्षय बेटकर, प्रवासी, बदलापूर