आधारवाडी तुरुंगात कैद्याची पोलिसाला मारहाण

आधारवाडी तुरुंगात कैद्याची पोलिसाला मारहाण
Published on: 

सकाळ वृत्तसेवा
डोंबिवली, ता. ३० : कल्याणमधील आधारवाडी तुरुंगात एका कैद्याने रागाच्या भरात एका पोलिस हवालदाराला ठोश्या- बुक्क्यांनी मारहाण केल्याची घटना सोमवारी (ता. २८) घडली. त्याला कल्याण जिल्हा व सत्र न्यायालयात एका गुन्ह्यातील सुनावणीच्या कामासाठी पोलिस बंदोबस्तात नेण्यात आले होते. सुनावणीच्या वेळीही त्याने न्यायालयात न्यायदंडाधिकारी यांच्याशी वाद घालण्याचा प्रयत्न केला होता, असे खडकपाडा पोलिस ठाण्यातील तक्रारीत म्हटले आहे. सूरज शंकर सिंग ऊर्फ विरेंद्र शंकर मिश्रा (वय २९) असे कैद्याचे, तर सुनील लोटन पाटील (वय ५७) असे पोलिस हवालदाराचे नाव आहे.

सूरज सिंग (रा. सोनाळे, भिवंडी) याच्यासह इतर चाैघांना सोमवारी दुपारी कल्याण जिल्हा व सत्र न्यायालयात त्यांच्या गुन्ह्यातील सुनावणीसाठी पोलिस वाहनातून आणण्यात आले होते. न्यायालय सुरू झाल्यानंतर त्यांना न्यायालयाच्या सूचनेप्रमाणे न्यायदंडाधिकारी यांच्यासमोर हजर करण्यात आले. सुनावणी सुरू असताना सूरज हा त्याच्या खटल्यासंदर्भात न्यायदंडाधिकारी यांच्याशी वाद घालू लागला. न्यायालयाने त्याला शांत राहण्याची सूचना केली. बंदोबस्तावरील पोलिस त्याला शांत राहण्यास सांगत होते; पण ताे ऐकण्यास तयार नव्हता. शेवटी न्यायालयाने त्याला न्यायदान कक्षाच्या बाहेर नेण्याची सूचना केली. पोलिसांनी सूरजला न्यायदंडाधिकारी यांच्या समोरून हटवून त्याला न्यायदान कक्षाच्या बाहेर आणले. या गोष्टीचा त्याला राग आला.

न्यायालयातील या प्रकारानंतर सर्वांना आधारवाडी तुरुंगात पुन्हा पोलिस बंदोबस्तात आणण्यात आले. सूरजला तुरुंगात आणल्यानंतर त्याच्या कोठडीत हवालदार पाटील घेऊन चालले होते. त्या वेळी अचानक सूरजने पाटील यांच्या कानशिलात मारली. काही क्षणात त्याने आक्रमक रूप धारण करून रागाच्या भरात पाटील यांच्या छातीवर, पोटावर ठोशा-बुक्क्यांनी बेदम मारहाण केली. हा प्रकार सुरू असताना इतर पोलिस कर्मचारी धावून आले. त्यांनी सूरजच्या तावडीतून हवालदार पाटील यांची सुटका केली.

सकाळ+ चे सदस्य व्हा

ब्रेक घ्या, डोकं चालवा, कोडे सोडवा!

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com