डॉक्टर आणि प्रशासनाने ठरवले आणि सांगलीतील अडीच महिन्याच्या बाळाचा जीव वाचला...

मुंबई ः कोरोनाच्या महामारीने मुंबईसह राज्यातील अनेक रुग्णांना रुग्णालयात किमान खाट तरी मिळावा म्हणून व्यवस्थेशी झगडावे लागत असल्याचे अनेकदा समोर आले आहे. मात्र प्रशासन आणि दोन रुग्णालयातील डॉक्टरांमध्ये योग्य समन्वय असला तर काहीही शक्य होऊ शकते, याचा प्रत्यय नुकताच मुंबईत आला. आरोग्य यंत्रणेच्या नियोजनामुळे सांगलीतील एका अडीच महिन्याच्या बालकाला जीवदान मिळाले आहे. 

वाचा ः मुंबईतील गुन्हेगारीवर बसणार वचक; चकमक फेम सचिन वाझेंची झाली 'इथे' नियुक्ती....

रोहित चव्हाण बालकाचा 16 मार्च रोजी सांगलीतील एका रुग्णालयात जन्म झाला. जन्मताच रोहितची प्रकृती नाजूक होती. जन्मानंतर अवघ्या आठवड्याभरात देशभरात लॉकडाऊन जाहीर झाला. त्यामुळे रोहितवर पुढील उपचार कसे करावे, याबाबत त्याच्या आई वडिलांना चिंता वाटत होती. सांगलीतील डॉ. लक्ष्मीकांत मगदूम यांनी रोहितची तपासणी केली. त्यात त्याच्या दोन मुख्य रक्तवाहिन्यांमध्ये बिघाड असल्याचे लक्षात आले. त्यामुळे त्याच्या रक्तातील ऑक्सिजनचे प्रमाण खूपच कमी होते. सखोल तपासणी केल्यावर फुफ्फुसाकडून यकृताकडे होणाऱ्या शुद्ध रक्ताच्या पुरवठ्यातही प्रश्न आले होते. मी माझ्या डॉक्टरी व्यवसायात या प्रकारची केस प्रथमच पाहिल्याचे डॉ. लक्ष्मीकांत मगदूम यांनी सांगितले. 

वाचा ः बेस्ट कामगार करणार मूक निदर्शने; कामगारांच्या मागण्यांकडे लक्ष वेधण्यासाठी उचलले पाऊल...

डॉ.मगदूम हे सांगलीतील राष्ट्रीय बाल स्वास्थ्य मिशनमघ्ये वैद्यकीय आधिकारी आहेत. डॉ. मगदूम यांनी तातडीने मुंबईत संपर्क साधला आणि मुंबईत शस्त्रक्रिया करण्याची सुविधा उपलब्ध करुन देण्यात आली. सांगलीहून मुंबईला रवाना करण्यासाठी ऑक्सिजन आणि अन्य आपात्कालीन यंत्रणेसह रुग्णवाहिका सज्ज ठेवण्यात आल्या. तत्पूर्वी रोहितला मुंबईला नेण्यापूर्वी त्याची कोरोना चाचणी करण्यात आली. ती निगेटिव्ह असल्याने पुढील सूत्रे वेगाने हलली. अवघ्या दहा तासांत रोहितला मुंबईला हलवण्यात आले.

वाचा ः कोरोनासाठी आयुर्वेद, युनानी आणि होमिओपॅथ, 'या' आहेत मार्गदर्शक सूचना...

सांगली जिल्हाधिकारी कार्यालयातील आधिकाऱ्यांनी मुलाला सांगलीहून मुंबईला नेण्यासाठी रुग्णवाहिकेची व्यवस्था केली. राष्ट्रीय बाल स्वास्थ्य कार्यक्रमाअंतर्गत हे सर्व उपचार करण्यात आले. मुंबईतील एनएच एसआरसीसी मुलांच्या रुग्णालयात ही शस्त्रक्रिया करण्यात आली. या सेवाभावी रुग्णालयाने शस्त्रक्रियेचा काही खर्च उचलला. मुंबईहून सांगलीस परत येण्यापूर्वी मुलाची कोरोना चाचणी करण्यात आली. आता मुलगा आई वडिलांसह गावी परतलाही आहे.