Shivsena-MNS: 'घरात आई-वडील, मुलं-बाळं वाट बघत असतील...'; संजय राऊतांचा मनसैनिकांना इशारा

Mumbai News: ठाण्यामध्ये ठाकरे गटाचे प्रमुख उद्धव ठाकरे यांच्या ताफ्यावर हल्ला करण्यात आला होता. ताफ्यावर मनसैनिकांकडून नारळ, शेण, टोमॅटो फेकण्यात आले होते. यावरून राजकीय वातावरण तापलं आहे. यावरून खासदार संजय राऊत यांनी प्रतिक्रिया दिली आहे. दिल्लीच्या अहमद शहा अब्दालीने काहींना सुपारी दिली आहे. त्यामुळे हा काळोखात हल्ला झाला, असं ते म्हणाले.

काल ठाण्यामध्ये गडकरी रंगायटनमध्ये शेकडो शिवसैनिकांच्या उपस्थितीत भगवा सप्ताह जल्लोषात पार पडला. शिवसेना पक्षप्रमुख उद्धव ठाकरे यांचे ठाण्यात येताना जागोजागी स्वागत झाले . भरगच्च सभागृह होता. भगवा सप्ताह त्यानुसार ठाण्यात साजरा झाला. काल काय झालं हे मला माहित नाही किंवा उद्धवजींना देखील माहीत नसावं. ते कार्यकर्ते अब्दुल शहा अब्दालीचे होते, असं संजय राऊत म्हणाले.

बीडमध्ये मनसे प्रमुखांसोबत जे झालं त्याचा शिवसेनेचा संबंध नाही, हे मी आधीच स्पष्ट केलं आहे. पण,ॲक्शन रिएक्शन करण्याचा प्रयत्न झाला असेल तर माझा त्यांना हात जोडून विनंती आहे, की तुम्ही काळोखाचा फायदा घेऊन काही फेकलं असेल म्हणून तुम्ही वाचला. मर्दाची औलाद असता तर समोर येऊन केलं असतं, असं ते म्हणाले.

मला त्यांना हात जोडून विनंती आहे. त्यांनी काळोखात, अंधारात, लांबून, लपून-छपून अशी कृती करू नका. तुमच्या घरात तुमचे आई-वडील वाट पाहतात, मुलं-बाळं वाट पाहतात, तुमची पत्नी वाट पाहते. त्यामुळे तुम्ही या स्तरावर जर येत असाल तर काळजी घ्या. दिल्लीच्या अहमद शहा अब्दालीची सुपारी घेऊन हा गोंधळ निर्माण केला जात आहे. अहमद शहा अब्दालीने दोन ते तिघांना सुपारी दिली आहे, अशी टीका राऊत यांनी केली.

हे जे सर्व चालू आहे ते फक्त दिल्लीच्या अहमदशहा अब्दालीच्या इशारावरून सुरु आहे. हे देवेंद्र फडणवीस मिंदे गट यांना माहिती आहे. समोर आले असते तर त्यांना सांगितलं असतं शिवसैनिक काय आहे, अशी टीका राऊतांनी केली.