यशस्वी उपचारानंतरही कुटुंबीय त्यांना स्वीकारत नाहीये!

क्षयरुग्णांवर कुटुंबीयांचा अघोषित बहिष्कार
क्षयरुग्णांवर कुटुंबीयांचा अघोषित बहिष्कार

मुंबई : क्षयरोगावरील यशस्वी उपचारानंतर रुग्णालयाने घरी जाण्यास परवानगी दिलेल्या दीडशेहून अधिक क्षयरोगाच्या रुग्णांची अवहेलना होत आहे. स्वतःच्या कुटुंबीयांनी या रुग्णांवर अघोषित बहिष्कार टाकल्याने त्यांच्यावर रुग्णालयातच खितपत पडून राहण्याची वेळ आली आहे.

क्षयरोगावरील उपचारासाठी शिवडीतील पालिकेच्या टीबी रुग्णालयाची ओळख आहे. या रुग्णालयात १२०० खाटांची व्यवस्था आहे. सध्या ४९८ क्षयरोगाच्या रुग्णांवर रुग्णालयात उपचार सुरू आहेत. काही रुग्ण नव्याने भरती होत आहेत; तर काही रुग्ण दोन ते तीन वर्षांपासून या रुग्णालयात आहेत. यापैकी १५३ रुग्णांवर उपचार पूर्ण झाले असून त्यांना घरी जाण्यास परवानगी आहे. केवळ त्यांना घरी गेल्यावर नियमित औषधे घ्यावी लागतात. या रुग्णांना घरी जाण्याची ओढ लागली असली तरी त्यांचे कुटुंबीय त्यांना घरात घ्यायला तयार नाहीत. बाधित रुग्णांना घरात घेतल्यास आपल्यालाही क्षयरोगाचा संसर्ग होण्याची भीती त्यांना वाटत आहे. त्यामुळे काही रुग्ण तर गेल्या पाच वर्षांपासून रुग्णालयात राहत आहेत. 

शिवडीच्या टीबी रुग्णालयात दररोज क्षयरोगाचे सरासरी ४० रुग्ण दाखल होतात. या रुग्णालयात उपचार घेत असलेल्या रुग्णांमध्ये ७२ टक्के पुरुष; तर २७ टक्के महिला रुग्ण आहेत. त्यात मुंबईतील ५१ टक्के, इतर जिल्ह्यातील १३.८८ टक्के; तर राज्याबाहेरील रुग्णांचे प्रमाण ३४.७२ टक्के आहे. 

क्षयरोगावर योग्य उपचार उपलब्ध असून तो पूर्णपणे बरा होणारा आजार आहे; मात्र या आजाराबाबत लोकांमध्ये भीती आणि गैरसमज आहे. क्षयरुग्णाला उपचारानंतर घरी नेल्यास आपल्यालाही क्षयरोगाचा संसर्ग होईल, अशी भीती त्यांना असते. त्यामुळे काही नातेवाईक त्यांना घरी न्यायला तयार नाहीत. त्याशिवाय काही रुग्णांना आपण घरी गेल्यास आपल्याला योग्य वागणूक मिळणार नाही, अशी भीती वाटते. त्यामुळे ते स्वतःहून घरी जायला तयार नाहीत. अशा सर्व रुग्णांसाठी सहानुभूतीने रुग्णालयातच निवासाची आणि भोजनाची व्यवस्था करण्यात आली आहे. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com