Mumbai Power Supply : बदलापूर, अंबरनाथकरांना अखंडित वीजपुरवठा

Uninterrupted Power Supply : बदलापूर, अंबरनाथ मध्ये सारखी वीज पुरवठा खंडित होत असल्याने स्थानिकांना त्याचा त्रास सहन करावा लागत होता. परंतु आता वडवली आणि आंबेशिव उच्चदाब वाहिन्यांमधून वीजपुरवठ्याला सुरुवात करण्यात आली आहे. महापारेषणच्या २२०/२२ केव्ही जांभूळ अतिउच्चदाब उपकेंद्राचा पहिला टप्पा ४ मे रोजी कार्यान्वित केला आहे. यामध्ये ५० एमव्हीए क्षमतेचा पहिला ट्रान्स्फॉर्मर कार्यान्वित झाला आहे.

त्यामुळे वडवली व आंबेशिव या दोन २२ केव्ही उच्चदाब वाहिन्यांमधून सुरळीतपणे वीजपुरवठा सुरू करण्यात यश आले आहे. परिणामी महापारेषणच्या मोरिवली उपकेंद्रावरील भार कमी होऊन महावितरणच्या बदलापूर, अंबरनाथ, कानसई आणि कात्रपमधील ग्राहकांना दिलासा मिळाला आहे.

जांभूळ उपकेंद्रात ५० एमव्हीए क्षमतेचे दोन ट्रान्स्फॉर्मर बसवण्यात येणार आहेत. यातील पहिला ट्रान्स्फॉर्मर शनिवारी कार्यान्वित केला आहे. या उपकेंद्रातून निघणाऱ्या चारपैकी वडवली आणि आंबेशिव या उच्चदाब वीजवाहिन्या ही शनिवारीच कार्यान्वित करण्यात आल्या. परिणामी या भागाला वीजपुरवठा करणाऱ्या मोरिवली उपकेंद्रातील भार आता कमी झाला.

मोरिवली उपकेंद्रावरील भार कमी झाल्यामुळे विजेच्या अधिक मागणीच्या कालावधीत बदलापूर, अंबरनाथ, कानसई आणि कात्रप परिसरातील ग्राहकांचा बाधित होणारा वीजपुरवठा यापुढे सुरळीतपणे सुरू राहणार आहे.