कोल्हापूरचे ॲड. युवराज नरवणकर भारतातील सर्वोत्तम आणि प्रभावशाली फोर्ब्सच्या यादीत

कोल्हापूर :  जगद्विख्यात फोर्ब्स मासिकाने भारतातील सर्वोत्तम आणि प्रभावशाली वकिलांच्या जाहीर केलेल्या यादीमध्ये ॲड. युवराज नरवणकर यांचा समावेश केला आहे. दरवर्षी उद्योग क्षेत्रातील नामांकने फोर्ब्सतर्फे जाहीर केली जातात. यावर्षी पहिल्यांदाच कायदा क्षेत्राचा समावेश नामांकनामध्ये केला होता. 

ॲड. नरवणकर मूळचे कोल्हापूरचे आहेत. न्यायालयातील अनुभव, विविध क्षेत्रातील काम आणि इतर आव्हानात्मक निकष नामांकनासाठी वापरले जातात. यावर्षीच्या नावांची निवड करणाऱ्या पॅनेलमध्ये सर्वोच्च न्यायालयाचे न्यायाधीश मदन लोकूर, न्यायमूर्ती ए. के. सिक्री, सहसॉलिसिटर जनरल सर्वोच्च न्यायालयातील सिद्धार्थ लुथ्रा यांच्यासह इतर अनेक वरिष्ठ अधिवक्ता आणि चार नॅशनल लॉ स्कूलचे कुलगुरू यांचा समावेश होता. 

हेही वाचा- Breaking :  कागल एमआयडीसीमध्ये अतिउच्च दाबाची तार कोसळली

काल दिल्ली येथे व्हर्च्युअल स्वरूपात झालेल्या कार्यक्रमांमध्ये त्यांच्या नावाची घोषणा झाली. लवकरच कार्यक्रमाचे प्रक्षेपण दूरचित्रवाणीवर होणार आहे. ॲड. नरवणकर सध्या मुंबई उच्च न्यायालय आणि सर्वोच्च न्यायालयात कार्यरत असून अनेक महत्त्वाच्या खटल्यांमध्ये आणि याचिकांमध्ये त्यांचा महत्त्वपूर्ण सहभाग राहिला आहे. नुकतीच केंद्र सरकारच्या नाणेनिधीचे प्रमुख कायदेशीर सल्लागार म्हणून त्यांची नियुक्ती झाली आहे.

संपादन- अर्चना बनगे