जलपर्णी हटविण्याचे इचलकरंजी पालिकेसमोर आव्हान

इचलकरंजी : पंचगंगा नदीपात्रातील जलपर्णी काढण्याच्या मोहिमेला गती आली. पण, तितक्‍याच गतीने जलपर्णी वाढत असल्याने जलपर्णी हटविण्याचे मोठे आव्हान पालिकेसमोर आहे. दरम्यान, आरोग्य सभापती संजय केंगार यांनी पंचगंगा नदीघाटावर जाऊन या मोहिमेची पाहणी करून माहिती घेतली. त्यांनी तातडीने आमदार प्रकाश आवाडे यांच्याशी संपर्क साधला. पंचगंगा नदी तातडीने प्रवाहित करण्याची मागणी त्यांच्याकडे केली. 

येथील पंचगंगा नदीपात्र जलपर्णीने व्यापले असून, दोन दिवसांपासून जलपर्णी काढण्याची मोहीम सुरू आहे. अमृत भोसले यांच्या नेतृत्वाखालील पैलवानांची एक टीम कार्यरत आहे. पालिकेचे आरोग्य विभागाचे कर्मचारीही सकाळच्या सत्रात या मोहिमेत सहभागी झाले आहेत. आज बोटीच्या सहाय्याने मोठ्या प्रमाणात घाट परिसरातील जलपर्णी हटविण्यात आली. मात्र, तितक्‍याच वेगाने जलपर्णी वाढत असल्याने संपूर्ण जलपर्णी काढण्याचे मोठे आव्हान पालिकेसमोर आहे. 

दरम्यान, आरोग्य सभापती केंगार यांनी नदीघाट परिसरात जाऊन जलपर्णी काढण्याच्या मोहिमेची माहिती घेतली. नदी प्रवाहित केल्याशिवाय जलपर्णीचा प्रश्‍न मार्गी लागणार नाही. त्यामुळे त्यांनी आमदार आवाडे यांच्याशी संपर्क साधला. पंचगंगा नदी प्रवाहित करण्याबाबत त्यांच्याकडे श्री. केंगार यांनी विनंती केली आहे. याबाबत जिल्हाधिकाऱ्यांच्या माध्यमातून पाटबंधारे विभागाकडे पाठपुरावा करण्यात येईल, असे आवाडे यांनी सांगितले. या वेळी स्वच्छता निरीक्षक विजय पाटील, बबन कांबळे उपस्थित होते. 
 

संपादन - सचिन चराटी

kolhapur