कोल्हापुरातील कळंबा कारागृहातून कोरोना झाला आउट

कोल्हापूर - कळंबा कारागृहाची कोरोनामुक्तीच्या दिशेने यशस्वी वाटचाल सुरू आहे. बाधित ८४ बंदी कोरोनामुक्त झाले. तात्पुरते कारागृहाच्या मदतीतून योग्य वेळी केलेल्या तपासण्या, औषध उपचारासह प्रशासनाने केलेल्या उपाययोजनेचे हे फलित ठरले आहे.  

राज्यातील अनेक कारागृहांत कोरोनाचा शिरकाव झाला. हा संसर्ग वाढू नये, यासाठी  सात वर्षाच्या आतील शिक्षा असलेल्या गुन्ह्यातील बंदी व न्यायालयीन बंदींना न्यायालयाच्या परवानगीने पॅरोल व जामिनावर सोडले. कळंबा कारागृहातील चारशेहून अधिक बंदी यातून घरी गेले. उपाययोजना करूनही कळंबा कारागृहात कोरोनाचा शिरकाव झाला. 

तात्पुरते कारागृह
नव्याने दाखल होणारे बंदीमुळे संसर्ग वाढण्याचे धोके निर्माण होऊ शकतात. याचा विचार करून ‘आयटीआय’तील मुलांच्या वसतिगृहात तात्पुरते कारागृह सुरू केले. नव्याने दाखल होणारे सर्व बंदीची तपासणी करून त्यांना येथे १४ दिवस ठेवले जाते. तेथून त्यांना बिंदू चौक सबजेलमध्ये व ठराविक काळानंतर कळंबा कारागृहात हलविण्यात येते. या कारागृहाला ‘कोविड केअर सेंटर’ म्हणून प्रशासनाने मान्यता दिली. येथे महापालिका आयुक्तांनी एक डॉक्‍टर, औषधे, पीपीई किट, हेड शिल्ड अशी आवश्‍यक यंत्रणाही पुरवली आहे. 

हे पण वाचा - कांदा उत्पादक संतप्त : कोल्हापुरात शेतकरी करणार शुक्रवारी आंदोलन 

व्हिडिओ कॉलींगची सुविधा
संपर्क टाळण्यासाठी कळंबा कारागृहातील मुलाखती बंद केल्या आहेत. गरजेवेळी नातेवाईक व न्यायालयीन कामासंदर्भात वकिलांशी व्हिडिओ कॉलींगद्वारे भेट घालून दिली जात असल्याचे शेळके यांनी सांगितले. 

बाधित झालेले ८४ बंदी कोरोनातून मुक्त झाले आहेत. कारागृहात मास्क, सोशल डिस्टन्सिंगचे काटेकोर पालन करण्यात येत असून, निर्जंतुकीकरणावरही भर दिला जात आहे. 
- शरद शेळके, अधीक्षक, कळंबा कारागृह.

हे पण वाचा - राजू शेट्टींची ७२२७ देतेय साथ देण्याचा संदेश  

संपादन - धनाजी सुर्वे