शास्त्रीनगरात पती-पत्नीला कोरोना; 28 जण क्वारंटाईन 

कोल्हापूर : शास्त्रीनगर परिसरातील सरनाईक वसाहत येथे काल रात्री पती-पत्नीचा कोरोना अहवाल पॉझिटिव्ह आल्यानंतर आज सकाळी हा भाग सील केला. संबंधिताच्या कुटुंबातील सदस्यांसह संपर्कात आलेल्या 28 जणांना क्वारंटाईन केल्याचे सांगण्यात आले. 

शहरात कोरोना रुग्णांची वाढती संख्या चिंतेचा विषय बनत आहे. उपनगरातील रहिवाशांना नजीकच्या काळात सतर्कता बाळगावी लागणार आहे. रुग्ण संख्या पन्नासच्या घरात गेली आहे. सरनाईक वसाहत येथील रुग्ण एका खासगी रुग्णालयात उपचार घेत होते. काल रात्री त्यांचा रिपोर्ट पॉझिटिव्ह आला. 

संबंधिताची ये-जा कर्नाटक राज्यातून होत असल्याची माहिती आहे. पती-पत्नीचा रिपोर्ट पॉझिटिव्ह आल्याने काल रात्री महापालिकेने तातडीने पावले उचलली. बॅरिकेडस लावून परिसर सील केला. औषध फवारणी करून निर्जंतुकीकरण करण्यात आले. रात्री दोन वाजेपर्यंत संपर्कातील व्यक्तींचा शोध घेणे, त्यांना क्वारंटाईन करण्याचे काम सुरू होते. संबंधितांचा भाजीपाल्याचा व्यवसाय आहे. संपर्कात आल्याच्या संशयावरून 28 जणांना क्वारंटाईन करण्यात आले. 

सरनाईक वसाहत हा परिसर दाटीवाटीने वसला आहे. गेल्या वर्षी याच परिसरात डेंगीचे रुग्ण आढळून आले होते. नगरसेवक भूपाल शेटे, जावेद जमादार, मोहसीन खान, मुजिफ महात, वाशीम आकिवाटे यांनी यंत्रणा लावली.