शिवाजी विद्यापीठाच्या विद्यार्थ्यांना नोंदणीसाठी गुरुवारपर्यंत मुदतवाढ 

कोल्हापूर - विद्यापीठाच्या अंतिम वर्ष परीक्षा ऑनलाईन व ऑफलाईन पद्धतीने होणार असून त्यासाठी नोंदणी करणे आवश्‍यक आहे. ही नोंदणी करण्यासाठी गुरुवार (ता.22) सायंकाळी पाच वाजेपर्यंत मुदत वाढवून देण्यात आली आहे. याबाबतचे परिपत्रक आज प्रसिद्ध करण्यात आले. 

विद्यापीठाच्या अंतिम वर्षांच्या परीक्षा 27 ऑक्‍टोबरपर्यंत पुढे गेल्या. त्यामुळे विद्यार्थ्यांना नोंदणीसाठीही मुदतवाढ देण्यात आली आहे. विद्यार्थ्यांनी आपण परीक्षा ऑनलाईन देणार की ऑफलाईन याची नोंदणी करायची आहे. आता त्यांना त्यांच्या महाविद्यालयात तसेच विद्यापीठातील अधिविभागातही नोंदणी करता येणार आहे. परीक्षा देण्यासाठीचे पोर्टल आणि अनुषंगिक सूचना याची माहिती आणि व्हिडिओ विद्यापीठ संकेतस्थळावर उपलब्ध असून विद्यार्थ्यांनी त्याचा वापर करावा.

हे पण वाचा - खडसे यांचे आता उतार वयातील राजकारण, त्यांच्या जाण्याने पक्षाला काही होणार नाही

परीक्षा पध्दती कशी आहे? याचीही माहिती या व्हिडिओ व सूचनामध्ये नमूद करण्यात आलेली आहे. विद्यार्थ्यांना काही अडचण असल्यास संबंधित अधिविभाग/महाविद्यालयीन स्तरावरील समुपदेशक, शिक्षक यांच्याशी संपर्क साधावा, अथवा संबंधित परीक्षा विभागाशी संपर्क साधावा. विद्यार्थ्यांना कोणताही त्रास होवू नये व परीक्षा सुलभ पध्दतीने देता येईल यासाठी विद्यापीठ प्रशासनाने सर्व उपायोजना केलेल्या आहेत. अशी माहिती परीक्षा विभागाकडून देण्यात आली आहे.

संपादन - धनाजी सुर्वे