ई-फायलींग करा, कामकाज सुरळीत पार पाडा...

सकाळ वृत्तसेवा
शनिवार, 4 जुलै 2020

कोरोनाचा प्रादुर्भाव वाढत असल्याने ई-फायलिंगसारखे नवनवीन तंत्रज्ञान आत्मसात करून न्यायालयीन कामकाज सुरळीत पार पाडावे.

कोल्हापूर : कोरोनाचा प्रादुर्भाव वाढत असल्याने ई-फायलिंगसारखे नवनवीन तंत्रज्ञान आत्मसात करून न्यायालयीन कामकाज सुरळीत पार पाडावे. वकिलांनी काळानुसार बदलून ई-फायलिंगसारख्या तंत्रज्ञानाद्वारे दावे व खटले दाखल करण्याचे आवाहन प्रमुख जिल्हा व सत्र न्यायाधीश वृषाली जोशी यांनी केले आहे. 

सोशल डिस्टन्सिंगचे पालन करून उच्च न्यायालयाच्या आदेशानुसार कोल्हापूर जिल्हा न्यायालय आणि जिल्हा विधी सेवा प्राधिकरणाच्या संयुक्त विद्यमाने जिल्ह्यातील सर्व वकिलांना ई-फायलिंगचे प्रशिक्षण आयोजित करण्यात आले होते. यावेळी त्यांनी हे आवाहन केले. 

कोल्हापूर जिल्हा बार असोसिएशनचे अध्यक्ष गावडे म्हणाले, ""कोरोनामुळे लॉकडाउन झाला आहे. न्यायालयातील कामकाज नियमितपणे चालू करण्याचे उच्च न्यायालयाने निर्देश दिल्याने पक्षकारांची गैरसोय टाळणे व वेळेत प्रकरणे दाखल करण्याकरिता ई-फायलिंग प्रशिक्षणाचा सर्व वकिलांना चांगला फायदा होणार आहे.'' 

जिल्हा न्यायाधीश-3 महेश जाधव, प्रथमवर्ग न्यायदंडाधिकारी एस. एस. राऊळ, महाराष्ट्र व गोवा बार कौन्सिलचे सदस्य ऍड. विवेक घाटगे, जिल्हा बार असोसिएशनचे सचिव गुरुप्रसाद माळकर, जिल्हा न्यायालयाचे प्रबंधक संभाजी पाटील, न्यायसंकुलातील कर्मचारी उपस्थित होते. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Lawyers should work through e-filing ...