छत्रपती शिवाजी स्टेडियममध्ये बहुउद्देशीय सभागृह

कोल्हापूर, : छत्रपती शिवाजी स्टेडियममध्ये बहुउद्देशीय सभागृहाकरिता (मल्टिपर्पज हॉल) जिल्हा क्रीडा कार्यालयाने केंद्र सरकारच्या खेलो इंडिया योजनेंतर्गत मंत्रालयात प्रस्ताव पाठविला. सभागृहासाठी आठ कोटी 75 लाख रुपयांचा आराखडा तयार केला असून, इनडोअर गेमसाठी सभागृह महत्त्वाचे ठरणार आहे. 
शहराच्या मध्यवर्ती परिसरात छत्रपती शिवाजी स्टेडियम असून, ते क्रिकेटसाठी ओळखले जाते. जिल्हा क्रीडा कार्यालयातर्फे होणाऱ्या शालेय क्रीडा स्पर्धेत स्पर्धेंतर्गत मैदानावर खो-खो, फुटबॉल व क्रिकेटचे सामने घेण्यात येतात. अन्य क्रीडा प्रकारांसाठी क्रीडा कार्यालयाला शहरातील विविध ठिकाणांचा शोध घ्यावा लागतो. तेथे स्पर्धेचे आयोजन करावे लागते. विशेष म्हणजे शालेय क्रीडा स्पर्धांना पावसाळ्यात प्रारंभ होत असल्याने स्पर्धेचे वेळापत्रक कोलमडून जाते. ते बदलून तारखा निश्‍चित कराव्या लागतात. त्याचा नाहक त्रास क्रीडाधिकाऱ्यांना सहन करावा लागतो. 
छत्रपती शिवाजी स्टेडियममधील क्रीडा कार्यालयाच्या परिसरात बहुउद्देशीय सभागृह साकारण्यासाठी जागा उपलब्ध आहे. येथे सभागृह बांधल्यावर तेथे कबड्डी, खो-खो, टेबल-टेनिस, बुद्धिबळ, कॅरम, जिम्नॅस्टिक्‍स, योगा, व्हॉलीबॉल, बास्केटबॉल असे विविध खेळ आयोजित करता येतील. साधारणपणे 120 बाय 90 फूट आकाराचे सभागृह खेळाडूंसाठी उपलब्ध होणार आहे. त्यात मुले व मुलींसाठी स्वतंत्र चेंजिंग रूम केल्या जाणार आहेत. या सभागृहाचा प्रस्ताव क्रीडा कार्यालयाने प्राथमिक स्वरूपात तयार केला होता. त्यातील त्रुटींची दुरुस्ती करून तो मंत्रालयात पाठविला आहे. तेथून तो केंद्र सरकारकडे पाठविल्यावर त्याला ग्रीन सिग्नल मिळेल, असा क्रीडा कार्यालयाला विश्वास आहे. त्यासाठी जिल्ह्यातील लोकप्रतिनिधींनी पाठपुरावा करण्याची आवश्‍यकता आहे. 

सभागृहासाठी प्रस्ताव पाठविला आहे. त्याला ग्रीन सिग्नल मिळाल्यावर त्वरित त्याचे काम सुरू केले जाईल. एका छताखाली इनडोअर क्रीडा स्पर्धा व्हाव्यात, हीच आमची इच्छा आहे. 
- डॉ. चंद्रशेखर साखरे, जिल्हा क्रीडा अधिकारी