मित्रांची मिळाली साथ अन् विकी-मोहित जोडीने गीतांना दिला ‘बेधुंद’ संगीतसाज

टेंबलाईवाडी (कोल्हापूर) : गिटारिस्ट म्हणून त्याने संगीत प्रवास सुरू केला. पुढे विविध वाद्यांचे धडे घेतले. पाच मित्रांच्या साथीने ‘उडान बॅंड’ची स्थापना केली, संगीतकारांच्या हाताखाली काम करत स्वतः संगीत निर्मितीची सुरुवात केली. ‘विकी-मोहित’ जोडीने नामांकित संगीत कंपनीबरोबर ‘बेधुंद’ गाण्याची निर्मिती केली. सध्या ते दोन मराठी चित्रपट संगीतबद्ध करत आहेत.

जोडीतील मोहित कुलकर्णी सायबर परिसरात राहतो. लहानपणापासूनच संगीताची आवड. आई, बहिणीचे गायन ऐकतच तो मोठा झाला. त्याने दहावीत गिटारचे धडे घेतले. लंडनच्या नामांकित संगीत शाळेतून ऑनलाइन पद्धतीने गिटारच्या परीक्षेत तो उत्तीर्ण झाला. पुण्यात त्याने 
तबला, पियानो वादनाचे प्रशिक्षण घेतले. पुढे त्याने पाच मित्रांच्या साहाय्याने उडान नावाचा रॉक बॅंड सुरू केला. यात तो स्वतः मुख्य गिटारिस्ट आहे. या बॅंडने नामांकित गायक अवधूत गुप्ते यांच्याबरोबर सादरीकरण केले आहे.

हेही वाचा- कहाणी जीभ नाकाला लावणाऱ्या कुटुंबाची; वडील एक मिनिटांत तब्बल १४७ वेळा नाकाला जीभ लावतात, मुलीही काही मागे नाहीत -

हे सुरू असताना स्वतःची धून तयार करण्याची कल्पना चमकली. तो विकी वाघ या मित्राबरोबर मिळून गाण्यांची रचना करू लागला. विकीचे शब्द आणि त्याचे संगीत ही केमिस्ट्री चांगलीच जुळली. एका नामांकित संगीत कंपनीसाठी त्यांनी बेधुंद नावाचे गाणे निर्मित केले असून, ते यूट्यूबवर आहे.संगीत क्षेत्राचा परिचय होण्यासाठी त्याने मुंबईमध्ये दोन वर्षे काम केले. संगीत अभियंता ही पदवी मिळवली. कलेला तांत्रिक शिक्षणाची जोड मिळाल्यामुळे संगीताचे विविध पैलू अवगत झाले. संगीतकार म्हणून त्याने वेगळी ओळख निर्माण केली आहे.

हेही वाचा-कोल्हापूरचा अपमान सहन केला जाणार नाही ; एशियन पेंटने माफी मागितलीच पाहिजे -

 लहानपणापासून संगीताची आवड असल्याने मी या क्षेत्रात आलो. लोकांना माझे संगीत आवडते याचा आनंद होतो. बेधुंद गाण्याने मला प्रसिद्धी मिळाली.
- मोहित कुलकर्णी

संपादन - अर्चना बनगे