कोल्हापुरातील गारगोटीत समुह संसर्गाचा धोका वाढला      

गारगोटी : येथील श्री कॉलनीतील ५० वर्षीय व्यक्ती कोरोना पॉझिटिव्ह आढळली आहे. या आठवड्यात सामूहिक संसर्गातून दोन स्थानिक व्यक्ती कोरोना पॉझिटिव्ह आढळल्याने धोका वाढला आहे. त्यामुळे  खबरदारीची उपाययोजना म्हणून गारगोटी ग्रामपंचायतीने उद्या शनिवारपासून दोन दिवस लॉकडाऊनचा निर्णय घेतला असल्याची माहिती सरपंच संदेश भोपळे यांनी दिली.

कूर येथील एक वृद्धा कोरोना पॉझिटिव्ह आढळली. तिचा कोल्हापुरात उपचारादरम्यान मृत्यू झाला. यामुळे कूरला लॉकडाऊन सुरू करण्यात आले. तर त्यांच्या संपर्कातील व्यक्तींना अलगीकरण कक्षात पाठविण्यात आले. यापाठोपाठ गारगोटीतील श्री कॉलनीतील ५० वर्षीय व्यक्ती कोरोना पॉझिटिव्ह आढळून आल्याने नागरिकांत खळबळ उडाली आहे. या व्यक्तीवर एका खासगी डॉक्टरकडे उपचार सुरू होते. जास्त त्रास होऊ लागल्याने बुधवारी कोल्हापूर येथील डॉ. डी. वाय. पाटील रूग्णालयात उपचारासाठी दाखल केले. तेथे  त्यांचा स्वॅब तपासणीसाठी घेतला होता. गुरूवारी रात्री त्यांचा अहवाल कोरोना पॉझिटिव्ह आला. त्यांच्या संपर्कातील पत्नी कोल्हापूर येथे आहे. तर दोन मुले, एक शिक्षक, पाचवडे येथील नातेवाईक, खासगी डॉक्टर अशा  पंधरा जणांना अलगीकरण कक्षात दाखल केले आहे. यातील सात जण हाय रिस्कवर आहेत. तहसीलदार अमोल कदम यांनी शुक्रवारी सकाळी रुग्ण आढळलेल्या परिसरासाठी प्रतिबंधित क्षेत्र आदेश लागू केला.

हे पण वाचा - कोल्हापूर जिल्ह्यातील 6 मार्ग बंद; पर्यायी मार्गाने वाहतूक सुरु

तालुका आरोग्य अधिकारी एस. बी. एत्नाळकर, सरपंच संदेश भोपळे, सदस्य प्रकाश वास्कर, स्नेहल कोटकर यांच्यासह सदस्यांनी श्री कॉलनी परिसर सील केला. तर सामूहिक संसर्गाचा धोका टाळण्यासाठी ग्रामपंचायत व व्यापारी संघटनेच्या पदाधिकार्‍यांनी बैठक घेऊन हा दोन दिवस लॉकडाऊनचा निर्णय घेतला असल्याचे सरपंच संदेश भोपळे यांनी सांगितले.

संपादन - धनाजी सुर्वे