मतदानाचा टक्का वाढला; पदवीधर तीन, शिक्षकमध्ये दीडपट वाढ

कोल्हापूर : विधान परिषदेच्या पुणे पदवीधर आणि शिक्षक मतदारसंघातील निवडणुकीसाठी काल मतदान झाले. २०१४ मध्ये झालेल्या निवडणुकीच्या तुलनेत मतदानात सुमारे तीनपट वाढ झाल्याचे दिसून आले. 
 

गेल्या निवडणुकीत पदवीधरसाठी २७.३३ टक्के मतदान झाले होते.  यंदा मतदान संपेपर्यंत हाती आलेल्या आकडेवारीनुसार तब्बल ६८.०९ टक्के मतदान झाले. गेल्या निवडणुकीत शिक्षक मतदारसंघात ५५ टक्के मतदान झाले होते. या वर्षी ८६.७ टक्के मतदान झाले. नव्याने बनवण्यात आलेली मतदार यादी, निवडणुकीत चुरस यामुळे हे मतदान वाढले, असा अंदाज आहे. शिक्षक मतदारसंघात स्थानिक उमेदवार असल्याने मतदानाची टक्केवारी वाढल्याचे सांगितले जाते.

पदवीधर आणि शिक्षक मतदारसंघातील निवडणूक ही पूर्वी राजकीय वर्तुळातही फारशी चर्चिली जात नव्हती. मतदानाच्या अतिशय कमी टक्केवारीमुळे येथील जय-पराजयाची गणितेही ठरलेली होती; मात्र यंदा पदवीधर आणि शिक्षक मतदारसंघातील निवडणुकीला वेळगेच स्वरूप प्राप्त झाले. 

हेही वाचा- चंद्रकांतदादा, हॅट्‌ट्रिक नव्हे क्‍लीनबोल्ड! : सतेज पाटील -

मतदार यादी नव्याने होणार असल्याने राजकीय पक्षांच्या कार्यकर्त्यांनी आणि इच्छुक उमेदवारांनी मोठ्या प्रमाणात नोंदणी केली. प्रचारातील आरोप-प्रत्यारोप, नेत्यांची विधाने यामुळे निवडणुकीला राजकीय रंग प्राप्त झाला. नव्याने नोंदणी केलेला युवा मतदार मतदानासाठी मोठ्या प्रमाणात बाहेर पडला. त्यामुळे यंदा मतदानाची टक्केवारी वाढली.

आकडे बोलतात...

वर्ष    मतदारसंघ    मतदारसंख्या    मतदान टक्केवारी
२०१४    पदवीधर    १,२०,८१३    २७.३३
२०२०    पदवीधर    ८९,५२९    ६८.०९
२०१४    शिक्षक    ९,६६२     ५५
२०१९    शिक्षक    १२,२३७    ८६.७

संपादन- अर्चना बनगे