मंगळवारी दुपारी दोननंतर करा गौरी आवाहन : पंचांगकर्ते मोहन दाते

दक्षिण सोलापूर (सोलापूर) : गणेशोत्सवाला आजपासून सुरवात झाली आहे. गणपतीबरोबरच घरोघरी ज्येष्ठा गौरीच्या आगमनाचेही वेध लागले आहेत. गौरी आवाहन मंगळवारी (ता. 25) अनुराधा नक्षत्रावर दुपारी एक वाजून 59 मिनिटांनंतर करता येईल, असे पंचांगकर्ते मोहन दाते यांनी "सकाळ'शी बोलताना सांगितले. 

हेही वाचा : शिक्षण आयुक्त म्हणाले, राज्यातील शाळा "यांच्या' निर्णयानंतरच सुरू होतील ! 

दरवर्षी भाद्रपद शुद्ध चतुर्थी म्हणजेच गणेश चतुर्थीला गणरायाच्या पार्थिव मूर्तीची प्रतिष्ठापना घरोघरी तसेच सार्वजनिक मंडळांतर्फे केली जाते. भव्य मिरवणुका, गुलालाची उधळण, ढोल-ताशांचा दणदणाट, भव्य लेझीम पथकांचे डोळ्यांचे पारण फिटणारी कला पाहण्यासाठी भाविकांची मोठी गर्दी होते. तसेच बाजारपेठांमध्ये गणेश मूर्ती व पूजा साहित्य खरेदीसाठी आबालवृद्धांची गर्दी असते. लहान मंडळांतील चिमुकल्यांचाही हलगी व ढोल-ताशांच्या गजरात गणरायाचे स्वागत करण्याचा कल असतो. मात्र यंदा कोरोना विषाणूच्या महामारीमुळे या सर्व गोष्टींवर मर्यादा आल्या आहेत. मात्र घराघरातून त्याच उत्साहात गणेशोत्सव होत आहे. 

हेही वाचा : ब्रेकिंग! दरोडा प्रकरणात दोन पोलिसांवर गुन्हा; एकाचे पलायन तर अधिकाऱ्यांचे तोंडावर बोट 

गणरायाच्या आगमनानंतर घरोघरी गौरी आगमनाचेही वेध लागतात. दरवर्षी ज्येष्ठा गौरीचे आवाहन भाद्रपद शुद्ध सप्तमीला अनुराधा नक्षत्रावर केले जाते. यंदा भाद्रपद सप्तमी मंगळवारी (ता. 25) असून अनुराधा नक्षत्र दुपारी 1 वाजून 59 मिनिटांनंतर आहे. त्यामुळे दुपारी दोननंतर घरोघरी गौरींचे आगमन होणार आहे. गौरीपूजन भाद्रपद अष्टमीला ज्येष्ठा नक्षत्रावर केले जाते. बुधवारी (ता. 26) ज्येष्ठा नक्षत्र दिवसभर असल्याने आपापल्या सोयीने दिवसभर गौरीपूजन, नैवेद्य व आरती करता येणार आहे. गौरी विसर्जन (गाठी घेणे) मूळ नक्षत्रावर केले जाते. गुरुवारी (ता. 27) दुपारी 12 वाजून 37 मिनिटांनंतर मूळ नक्षत्र असल्याने मध्यान्हानंतर गौरी विसर्जन (गाठी घेणे) करता येईल, असे पंचांगकर्ते मोहन दाते यांनी सांगितले. 

संपादन : श्रीनिवास दुध्याल